ڪراچي: سينيئر صحافي امتياز عالم کي ڌمڪين خلاف سيفما ۽ اي او وي جي جو احتجاج

ڪراچي (عوامي آواز نيوز) سينيئر صحافي امتياز عالم کي ڌمڪيون ملڻ خلاف ڪراچي پريس ڪلب آڏو سائوٿ ايشين فري ميڊيا ايسوسئيشن ڪراچي ۽ ايسوسئيشن آف وومن جرنلسٽ طرفان هٿن ۾ بينر ۽ پلي ڪارڊ کڻي احتجاجي مظاهرو ڪيو، جنهن ۾ اخباري مالڪن. سينيئر صحافين، سول سوسائٽي جي نمائندن ۽ قلم ڌڻين شرڪت ڪئي جنهن جي اڳواڻي بابر اياز، ڊاڪٽر فوزيه، ڊاڪٽر جبار خٽڪ، عامر محمود ۽ ڪراچي پريس جي صدر امتياز فاران ڪئي. ڊاڪٽر جبار خٽڪ چيو ته ضمير جي اظهار لاءِ ڪم ڪرڻ هر ڪنهن جو حق آهي ۽ اهڙي طرح باخبر رهڻ عوام جو حق آهي. هن چيو ته جيڪي عوام جي حقن جي نفي ڪن ٿا اهي دهشتگردي ذريعي پنهنجا نظريا مٿن مڙهڻ گهرن ٿا.هن چيو ته اسلام جي نالي تي جابر دهشتگردن جي نظريي جي جيڪو مخالفت ڪري ٿو انهن کي قتل ڪرڻ جو ڌمڪيون ڏنيون وڃن ٿيون. هن چيو ته قلم ڌڻين جي ڌمڪيون ملڻ ڪا نئين ڳالهه ناهي پر ان شرپسندن کي ٻڌائڻ گهرون ٿا ته صحافي حق سچ لکڻ کان مور نه مڙندا. عامر محمود چيو ته ڌمڪيون ڏيندڙن تي واضح ڪرڻ گهرون ٿا ته حق سچ لکڻ تان هٿ نه کڻنداسين. هن چيو ته سيڪيورٽي فراهمي جي مطالبي باوجود حڪومت ڪي به قدم ناهن کنيا ۽ انهن جي ڪنن تي جون به نه ٿي چري. هن وڌيڪ چيو ته طالبان ۽ ٻين دهشتگردن جي ڌمڪين کان ڊڄڻ وارا ناهيون ۽ صحافي هڪ آواز ۽ متحد آهن، امتياز عالم کي ڌمڪيون ملڻ جي جاچ ڪرائي وڃي. امتياز فاران چيو ته پاڪستان دنيا جو ٻيو نمبر ملڪ آهي جتي صحافين کي تمام گهڻا خطرناڪ لاحق آهن. هن چيو ته قلم ڌڻي جان خطري ۾ وجهي ذميواريون نڀائين پيا پر کين پوءِ به کين سيڪورٽي فراهم نه ڪرڻ افسوس جهڙي ڳالهه آهي. جيڪڏهن حڪومت سيڪيورٽي نه ڏني ته سندن جو گهيراءُ ڪيو ويندو.

وڌيڪ 13 طالبان قيدي ڇڏڻ جو اعلان، گيلاني ۽ تاثير جا پٽ به آزاد ٿيڻ گهرجن: وفاقي سرڪار

اسلام آباد (عوامي آواز نيوز) وفاقي گهرو وزير چوڌري نثار علي خان 13 طالبان قيدين کي آزاد ڪرڻ جو اعلان ڪندي چيو آهي ته حڪومت ۽ طالبان ڪميٽين وچ ۾ اصولي فيصلو ٿي ويو آهي، ٻنهي پاسن کان غيرعسڪري قيدين جي آزادي جو عمل شروع ڪيو پيو وڃي. 13 قيدين ۾ ڪجهه ماڻهو اُهي آهن جيڪي طالبان جي فهرست ۾ شامل هئا. حڪومتي ڪميٽي موجب فهرستن ۾ موجود اهڙا قيدي آهن جن خلاف ثبوت ناهن، کين مرحليوار آزاد ڪيو ويندو. ميڊيا سان ڳالهائيندي چوڌري نثار چيو ته ڳالهين تي گهڻو ڳالهائڻ نقصانڪار ثابت ٿي رهيو آهي. جن ڏکيائين ۾ ملڪ گهيريل اهي اُن مان ڪڍڻ لاءِ صبر جي ضرورت آهي. هن چيو ته معاملا مثبت انداز ۾ اڳتي وڌي رهيا آهن، ڳالهين جي عمل سان پاڪستان ۾ امن ايندو، اسين چاهيون ٿا نتيجا ڏيندڙ ڳالهيون ٿين جڏهن ته ڳالهين تي تنقيد ڪندڙ گذريل ڏينهن ۾ ڏسن ته ڪيتريون جانيون بچيون آهن. هن چيو ته آئينده جي لائحه عمل تي طالبان ڪميٽي سان ڳالهيون ٿيون، اسين چاهيون ٿا ته طالبان پاران واضح نڪتا اچن ۽ حڪومت به واضح نڪتن سان گڏ ويهندي. حڪومت جو هڪ ئي نڪتو آهي ته آئين ۽ قانون موجب ملڪ ۾ امن ٿيڻ گهرجي. هن چيو ته طالبان شوريٰ سان ملاقات جي وقت تقريبن 30 قيدين کي آزاد ڪري چڪا هونداسين، حڪومت خيرسگالي طور تي طالبان قيدين کي آزاد ڪيو آهي، هن چيو ته پروفيسر اجمل، يوسف رضا گيلاني ۽ سلمان تاثير جي پٽن کي آزاد ڪرڻ جي ڳالهه ڪئي آهي. طالبان کي به بي گناهه ۽ غير عسڪري قيدين کي آزاد ڪرڻ گهرجي. هڪ سوال تي هن چيو ته ڪنهن به ٻار جي بيان تي تبصرو ڪريان، سوال ڪندڙ کان پڇان ٿو ته گذريل 5 سالن تائين اُهي ماڻهو ستل هئا؟ هن چيو ته آستين چڙهائي تقريرون ڪندڙن بابت عوام جي راءِ مثبت نٿي ٿي سگهي، گذريل ڏينهن تماشو لڳايو ويو. هن چيو ته ڳالهين جي عمل ڪوبه اهڙو فيصلو نه هوندو جيڪو پاڪستان جي مفاد خلاف هجي، ڳالهيون اڳتي وڌي رهيون آهن. پاڪستاني عوام جون دعائون ڳالهين سان گڏ آهن. هن سوال جي جواب ۾ چيو ته طالبان شوريٰ اهڙي هنڌ جو مطالبو ڪيو هو جتي انهن لاءِ آسان هجي. هن چيو ته ننڍيون ننڍين ايجنڊائن تي اعتماد جي فضا قائم ڪرڻ گهرجي، پرتشدد ڪارروائيون مڪمل خاتمي لاءِ ڏانهن وڌي رهيون آهن، وفاقي گهرو وزير چوڌري نثار جي صدارت ۾ حڪومت ۽ طالبان ڪميٽين جي گڏيل اجلاس ۾ ٻنهي ڌرين پاران ڳالهيون جاري رکڻ تي اتفاق ڪيو. ميڊيا سان ڳالهائيندي مولانا سميع الحق جو چوڻ هو ته چوڌري نثار جي موجودگي ۾ ٻنهي ڪميٽين جو اجلاس ٿيو. جنگبندي ۾ واڌ تي اطمينان جو اظهار ڪيو ويو، حڪومت ۽ طالبان جي خيرسگالي قدم تي به خيالن جي ڏي وٺ ڪئي وئي. هن چيو ته غير عسڪري طالبان جي آزادي تي حڪومت غور ڪري رهي آهي، وڏو مطالبو قيدين جي مٽا سٽا تي آهي. هن چيو ته ڳالهين لاءِ هنڌ جو تعين هڪ ٻن ڏينهن ۾ ٿي ويندو. طالبان شوريٰ سان ملاقات ايندڙ 2 کان 3 ڏينهن ۾ ٿيڻ جو امڪان آهي، ڳالهين لاءِ فضا بڻجي وئي آهي. حڪومت خيرسگالي طور قدم کڻي رهي آهي. هن چيو ته پهرين مرحلي ۾ غير عسڪري قيدين جي آزادي تي ڳالهه ٻولهه ٿي رهي آهي، اصل ڳالهيون هاڻي شروع ٿيڻ واريون آهن، ان سان اعتماد پيدا ڪيو پيو وڃي، ڳالهين ۾ جنگي قيدين جا معاملا سڀني کان آخر ۾ ايندا. انهيءَ موقعي تي حڪومتي ڪميٽي جي ميمبر رستم شاهه مهمند جو چوڻ هو ته ايندڙ 3 کان 4 ڏينهن ۾ طالبان شوريٰ سان سڌيون ڳالهيون ٿيڻ جو امڪان آهي.

موهن جي دڙي جي وڌيڪ آثارن جي ڳولا جو ڪم شروع، بلاول افتتاح ڪيو

 

لاڙڪاڻو (عوامي آواز نيوز) سنڌ حڪومت تاريخي ۽ تهذيبي ماڳ موهن جو دڙو جي آثارن جي نئين سر کوٽائي جو فيصلو ڪري ورتو. اڌ صدي کان پوءِ وڏي پيماني تي آثارن جي ڳولها لاءِ “ڊراءِ ڪور ڊرلنگ ” جي منصوبي تي ڪم شروع ڪيو ويو، منصوبي جو افتتاح پ پ پ چيئرمين بلاول ڀٽو زرداري ڪري ڇڏيو آهي. ان سلسلي ۾ ڪالهه سنڌ جي قديم تهذيبي ماڳ موهن جو دڙو جي نئين سر کوٽائي جو فيصلو ڪندي سنڌ جي ثقافت واري کاتي قديم آثارن جي ڳولها ۽ موهن جو دڙو جي مڪمل پکيڙ معلوم ڪرڻ لاءِ ڊراءِ ڪور ڊرلنگ واري منصوبي تي ڪم شروع ڪري ڏنو آهي. پيپلز پارٽي جي سرپرست اعليٰ بلاول ڀٽو زرداري ڪالهه موهن جو دڙو پهتو جتي هن ميوزم واري عمارت ۾ منصوبي جو افتتاح ڪيو. شرميلا فاروقي موهن جو دڙو ٽيڪنيڪل ڪاميٽي جي ميمبرن جو تعارف ڪرايو. پيور اينڊ اپلائيڊ جيالاجي سينٽر سنڌ يونيورسٽي جي پروفيسر ڊاڪٽر سرفراز سولنگي ڊراءِ ڪور ڊرلنگ واري منصوبي بابت بريفنگ ڏني. بعد ۾ بلاول ڀٽو موهن جي دڙي جي مک گيٽ ٻاهران ايئرپورٽ روڊ ۽ ڊرين جي وچ واري حصي وٽ ڊراءِ ڪور ڊرلنگ لاءِ لڳايل مشين جو بٽڻ دٻائي باضابطه افتتاح ڪيو. ان موقعي تي صحافين سان ڳالهائيندي شرميلا فاروقي چيوته موهن جو دڙو تي اڌ صدي اڳ 1965ع ۾ شروعاتي ڊراءِ ڪور ڊرلنگ ڪئي وئي هئي پر هاڻي وسيع پيماني تي ڊراءِ ڪور ڊرلنگ جو منصوبو شروع ڪيو ويو آهي. جڏهن ته ان منصوبي دوران ملندڙ مٽيءَ جي سيمپلز جي ثقافتي طور تحقيق ڪرائي ويندي. جنهن لاءِ نامور ماهرن جون خدمتون حاصل ڪيون ويون آهن. شروعاتي ڊراءِ ڪور ڊرلنگ وارو منصوبو ٻن مهينن ۾ مڪمل ٿيندو جنهن کان پوءِ تحقيق شروع ٿيندي ۽ ايندڙ 6 مهينن تائين سمورو ڪم تڪميل کي پهچندو. هن چيوته ممڪن آهي ته موهن جي دڙي جي آثارن جي پکيڙ مڪمل ڪرڻ بعد سڄي دنيا اندر هن تهذيبي ۽ تاريخي ماڳ کي سڀ کان وڏو ماڳ قرار ڏنو وڃي. هي تاريخي لمحو آهي. پروفيسر ڊاڪٽر سرفراز سولنگي چيوته جيڏي وڏي انساني آبادي موهن جو دڙو تي موجود هئي ان موجب موجوده آثار تمام گهٽ آهن، موهن جو دڙو جي مجموعي ايراضي 555 ايڪڙن تي مشتمل آهي جنهن مان هن وقت تائين صرف 10 سيڪڙو ايراضي جي کوٽائي ٿي چڪي آهي. جڏهن ته 90 سيڪڙو ايراضي اڃا اڻ کوٽيل آهي. هن ٻڌايو ته ڊراءِ ڪور ڊرلنگ واري منصوبي تي 8.7 ملين روپيا خرچ ايندو، جيڪو 2 مهينن ۾ مڪمل ڪيو ويندو ۽ ان مان 26 سئو مٽيءَ جا نمونا حاصل ڪيا ويندا. جنهن بعد مٽيءَ جي هٿ آيل نمونن تي تحقيق ڪرائي ويندي. تحقيقي ڪم لاءِ 200 ملين روپيا مختص ڪيا ويا آهن. هن ٻڌايو ته ڊراءِ ڪور ڊرلنگ وارو ڪم موهن جي دڙي جي 40 هنڌن تي ڪيو ويندو. بلاول ڀٽو زرداري جي پهچڻ کان اڳ موهن جو دڙو ۾ عام ماڻهن جي اچ وڃ مڪمل طور بند ڪري علائقي ۾ وڏي پيماني تي پوليس نفري بيهاري سڪيورٽي جا انتظام سخت ڪيا ويا هئا.

متحده سان مفاهمت ٿيڻ گهرجي، اڳوڻي انٽيليجنس سربراهه ميموگيٽ بيان تي معافي گهري: آصف زرداري

لاڙڪاڻو: اڳوڻو صدر آصف علي زرداري زيرو پوائنٽ جي دوري دوران ڪارڪنن کي هٿ لوڏي جواب ڏئي رهيو آهي

ڪراچي (عوامي آواز نيوز) اڳوڻي صدر ۽ پيپلز پارٽي جي شريڪ چيئرمين آصف علي زرداري چيو آهي ته اسان ايم ڪيو ايم سان ڇو مفاهمت نه ڪريون، ساڻن رڳو ٽن نڪتن تي اختلاف آهي. جيو ٽي وي جي اينڪر سهيل وڙائچ اڳوڻي صدر سان ملاقات ڪئي جيڪا 3 ڪلاڪ جاري رهي. ملاقات جا تفصيل ٻڌائيندي سهيل وڙائچ پنهنجي پروگرام ميري مطابق ۾ چيو ته آصف زرداري جو چوڻ هو ته متحده قومي موومينٽ سان رڳو ٽن نڪتن تشدد واري پاليسي، عوامي نيشنل پارٽي جي مخالفت ۽ فوج کي اقتدار ۾ اچڻ جي دعوت ڏيڻ تي اختلاف آهن. باقي ڪيترن ئي معاملن تي هڪٻئي سان سهمت آهيون ته پوءِ ايم ڪيو ايم سان مفاهمت ڇو نه ڪريون. آصف زرداري چيو ته ملڪ جي سڀ کان وڏي انٽيليجنس اداري جي اڳوڻي سربراهه رابطو ڪري ميمو گيٽ اسڪينڊل بابت معافي ورتي، کانئس پڇيم ته ڇو ائين ڪيّئي ته چيائين مون اهو سڀ ڪجهه باس جي چوڻ تي ڪيو. اڳوڻي صدر چيو ته هاڻ اسيمبلي ۾ اچڻ نه ٿو چاهيان، ٻاهر ويهي پارٽي جا معاملا ڏسندس.

ميرو خان ۽ سجاول جوڻيجي ۾ سرڪاري زمينون هارين کي ڏيڻ جي هدايت

شهدادڪوٽ/نواب شاهه/قمبر (نمائندن وٽان) اڳوڻي صدر آصف علي زرداري چيو آهي ته عوام کي سهولتون فراهم ڪرڻ پيپلز پارٽي جي منشور ۾ شامل آهي، جنهن ڪري پيپلز پارٽي هميشه پاڻ پتوريو آهي. قمبر-شهدادڪوٽ ضلعي جي غيبي ديرو واري علائقي ۾ ايف پي بچاءَ بند، غيبي ديرو مائينر، سلطان مائينر ۽ جمڙو مائينر جي دوري دوران صحافين سان ڳالهائيندي چيو ته پيپلز پارٽي جو جيئڻ ۽ مرڻ عوام سان آهي ۽ ڪڏهن به عوام کان جدا رهي نه ٿو سگهجي، اڳوڻي صدر دوري دوران زيرو ڪامپليڪس جو به دورو ڪيو، جتي ساڻن آبپاشي جو سيڪريٽري بابر آفندي، ايم اين اي عمران ظفر لغاري، ايم پي اي سردار خان چانڊيو، ايم پي اي فياض ٻٽ ۽ ضلعي قمبر شهدادڪوٽ جا پيپلز پارٽي اڳواڻ گڏ هئا. آصف زرداري چيو ته قمبرشهدادڪوٽ ضلعي جي ميرو خان ۽ سجاول جوڻيجو ۾ سرڪاري زمينون غريب بي زمين هارياڻين کي ڏنيون وينديون، جنهن لاءِ اهڙيون هدايتون سنڌ جي وڏي وزير کي ڪيون آهن، هوڏانهن اڳوڻو صدر آصف علي زرداري خصوصي جهاز ذريعي لاڙڪاڻي کان نواب شاهه پهتو، جتان روڊ رستي بالو جا قبا قبرستان پهچي پنهنجي والد ۽ والده مرحومه جي قبرن تي دعا گهري ۽ چادر چاڙي فاتح خواني ڪئي. ان موقعي تي آصف زرداري جو پيپلز پارٽي ايم اين اي فريال ٽالپر، ڪوآرڊينيٽر ضياالحسن لنجار استقبال ڪيو.

بلاول شادي پنهنجي مرضي سان ڪندو، غزل پيو ٻڌان: اڳوڻو صدر

ڪراچي: اڳوڻي صدر آصف علي زرداري چيو ته بلاول شادي پنهنجي مرضي سان ڪندو. آئون غزل ٻڌان پيو ۽ پڙهي رهيو آهيان. سهيل وڙائچ سان ڳالهائيندي آصف زرداري چيو ته بلاول شادي پنهنجي مرضي سان ڪندو، جيڪڏهن ٻاهران ڪا عورت وٺي آيو ته به پرواهه ناهي. ذوالفقار علي ڀٽو به ته نصرت ڀٽو سان شادي ڪئي، جنهن کي به اردو نه ايندي هئي. هن چيو ته آئون سياست کان پري آهيان، ڪراچي يا دبئي ۾ فيض کي پڙهان پيو، غزل ٻڌندو آهيان ۽ پهريون ڀيرو روز 10 ڪلاڪ سمهندو آهيان، جيڪا مون لاءِ عياشي آهي. بلاول کي ايم اين اي بڻائڻ جي صلاح تي آصف زرداري کلندي چيو ته توهان منهنجي پٽ کي منهنجي خلاف ڀڙڪائي رهيا آهيو.

آصف پيپلز پارٽي کي کاٻي ڌر جي پارٽي بڻائڻ نه ٿو ڏئي: سهيل وڙائچ

ڪراچي: آصف علي زرداري ۽ پيپلز پارٽي جي موجوده پاليسين تي تبصرو ڪندي سيئير صحافي سهيل وڙائچ چيو ته بلاول آصف علي زرداري جي والد طور احترام ڪري ٿو پر هو پنهنجي سوچ ۽ عمل ۾ خودمختيار آهي. سهيل وڙائچ چيو ته پيپلز پارٽي جا ڪجهه اڳواڻ پارٽي کي وري کاٻي ڌر ڏانهن وٺي وڃڻ چاهين ٿا پر آصف زرداري ايئن ڪرڻ نه ٿو چاهي. اڃا سنڌ حڪومت تي آصف زرداري جو ئي ڪنٽرول آهي. هنن ماڻهن جا ڪم ڪيا ته ايندڙ چونڊن ۾ کين ووٽ به ملندا نه ته وري ڪامياب نه ٿي سگهندا. بلاول کي فوري طور چونڊ وڙهي اسيمبلي ۾ پهچڻ گهرجي، کيس ايم اين اي ٿيڻ کپي.

ون يونٽ جا ڪڪر اڄ به سنڌ مٿان ڇانيل آهن، اهم پوسٽن تي غير سنڌي ڪهڙو ڪيس وڙهندا: اديب ۽ صحافي

ڪراچي: سگا پاران اعجاز قريشي جي ڪتاب جي مهورتي تقريب ۾ فضل الله قريشي، ڊاڪٽر سليمان شيخ، علي احمد بروهي۽ ٻيا شريڪ آهن

ڪراچي (عوامي آواز نيوز) سنڌ جي ناليواري اديبن، دانشورن ۽ مختلف مڪتب  فڪر سان تعلق رکندڙ شخصيتن چيو آهي ته ون يونٽ مڙهي سنڌ جي تعليمي حيثيت ختم ڪئي وئي ۽ ان جا ڪڪر اڄ به سنڌ ڌر تي تي ڇانيل آهن، ذوالفقار علي ڀٽو اقتدار جي اشاري ملڻ تي اينٽي ون يونٽ تحريڪ کان الڳ ٿي ويو. هنن وڌيڪ چيو ته 1947کان 57ع تائين آئين جو نه ٺهڻ بدنيتي هئي، ملڪ جا وارث بنگالين کي پسند نه ڪندا هئا ۽ بنگال جي ورهاڱي کانپوءِ جيڪو نئون پاڪستان وجود ۾ آيو اهو قائداعظم وارو پاڪستان نه هيو. اهڙن خيالن جو اظهار هنن ڪراچي سنڌ گريجوئيٽس ايسوسيئيشن پاران آرٽس ڪائونسل ۾ ناليواري اديب پروفيسر اعجاز قريشي جي ڪتاب” ون يونٽ ۽ سنڌ“ جي مهورتي تقريب کي خطاب ڪندي ڪيو.تقريب کي صدارتي خطاب ڪندي اقتصادي ماهر فضل الله قريشي چيو ته ون يونٽ ۾ سنڌ سان وڏا ظلم ڪيا ويا، ان وقت پنجاب جي شهر بهالپور ۾ سنڌ جي صحت جو سيڪريٽريٽ قائم ڪيو ويو ۽ اي جي آفيس وري لاهور ۾ هوندي هئي. هن وڌيڪ چيو ته اوڀر پاڪستان جي سيڪريٽريٽ ۾ 14سالن جي عرصي ۾ ٻه سنڌي ملازم هئا، رٿابندي ۽ ترقي وارن کاتن ۾ 70مان رڳو هڪ سنڌي آفيسر هيو. هن چيو ته سنڌ جي تاريخ ۾ پهريون 11سالن ۾ هڪ گورنر ۽ 6سالن کان هڪ وڏو وزير هلندو پيو اچي، 70جي ڏهاڪي کان پوءِ سنڌ جي اهم پوسٽن چيف سيڪريٽري ۽ فنانس سيڪريٽري سنڌي ناهي ته اهي سنڌ جو ڪهڙو ڪيس وڙهندا. هن چيو ته 1947کان 57ع تائين آئين جو نه ٺهڻ بدنيتي هئي، ملڪ جا وارث بنگالين کي پسند نه ڪندا هئا، بنگال جي ورهاڱي کانپوءِ جيڪو نئون پاڪستان ٺهيو اهو قائداعظم وارو پاڪستان نه هيو ۽ ان ۾ صوبن کان مرضي نه پڇي وئي، اهڙو نظام رائج ڪيو ويو جو 3صوبا هڪ صوبي جو محتاج بڻايو ويو. هن چيو ته هن چيو ته اعجاز قريشي جو ڪتاب لاجواب ۽ تاريخي ڪمپائليشن آهي جنهن ۾ هن سوين ريفرنس جو جائرو ورتو آهي. سگا سربراهه سليمان شيخ چيو ته ون يونٽ سبب سنڌ کي سڀ کان وڏو جيڪو نقصان پهتو اهو تعليم جي شعبي ۾ پيو، پهريان سنڌ جي تعليمي ادارن جي ايتري اهميت هوندي هئي جو انهي ڊگري تي سنڌين کي وڏيون وڏيون نوڪريون ملنديون هيون پر ون يونٽ ٺهڻ کانپوءِ سنڌ جي تعليمي حيثيت ختم ڪري ان نظام کي تباهه ڪيو ويو جنهن جو اڄ تائين ازالو ناهيون ڪري سگهيا ۽ تعليم جي حوالي سان سنڌ ڏينهون ڏينهن پوئتي ٿي رهي آهي.ڪتاب جي ليکڪ پروفيسر اعجاز قريشي چيو ته ون يونٽ سبب سنڌ اقتصادي، معاشي ۽ سماجي طور وڏو لوڙيو، ڪتاب ون يونٽ ۽ سنڌ ۾ تاريخ کي سهيڙڻ جي ڪوشش ڪئي آهي تنهن ڪري نوجوانن کي اهو ڪتاب پڙهڻ گهرجي. هن وڌيڪ چيو ته ون يونٽ ذريعي سنڌ سان جيڪي ڪلور ٿيا اهي اکين سان ڏٺاسين جيل پڻ ڀوڳيو. ناليواري ليکڪ امان الله شيخ چيو ته شام غريبان پڙهڻ بدران اهو ڏسڻ جي ضرورت آهي ته سنڌ اڄ ڪٿي بيٺي آهي، تنقيد غير جائز ڪرڻ سان تاريخ اسان کي وساري ڇڏيندي. هن وڌيڪ چيو ته سنڌ هن وقت ون يونٽ واري دوري کان به بدتر پوزيشن تي بيٺل آهي ۽ انهي چئلينج کي منهن ڏيڻ جي سخت کان سخت ضرورت آهي. هن چيو ته ماتما گانڌي جي پوٽي راج موهن گانڌي  پنهنجي ڪتاب ۾ لکيو آهي ته پنجاب جي سوچ سان مقابلو ڪرڻ لاءِ علم ۽ ادب جي ضرورت آهي، تنهن ڪري اسان کي پنهنجي مستقبل طرف ڌيان ڏيڻ گهرجي.مدد علي سنڌي چيو ته سنڌ جي هزارين سالن جي تاريخ ڏکن ۽ سورن سان ڀري پئي آهي. هن چيو ته هڪ طرف ون يونٽ سبب سنڌ سان ظلم ٿي رهيو هو ته ٻي طرف اتان جا چونڊيل نمائنده مزا ماڻي رهيا آهن.مسلم شميم چيو ته ون يونٽ جا ڪڪر اڄ به سنڌ مٿان ڇانيل آهن ۽ ان جو روح اڄ به زنده آهي. هن وڌيڪ چيو ته پاڪستان ٺهڻ جي شروعات کان پنجاب جي بيوروڪريسي ۽ چوڌري محمد علي  اردو کي قومي ٻولي جو درجو ڏيارڻ لاءِ قائداعظم محمد علي جناح کي غلط مشورو ڏيندا رهيا، جڏهن ته چوڌري محمد علي ون يونٽ جو ليکڪ هيو. هن چيو ته اينٽي ون يونٽ تحريڪ ۾ ڪجهه حصو اردو ڳالهائيندڙ سنڌين جو به آهي.خادم سومري چيو ته پير الاهي بخش ڪراچي ڏئي ڇڏي پر هو ون يونٽ جو مخالف هيو. هن اهو انڪشاف ڪيو ته ذوالفقار علي ڀٽو اينٽي ون يونٽ تحريڪ جو ميمبر هيو ۽ جڏهن کيس اقتدار ملڻ جو اشارو مليو ته هو تحريڪ کان الڳ ٿي ويو جنهن جو ذڪر تاريخ ۾ ٿين گهرجي ۽ جيڪڏهن اسان غلطين کان ڪم وٺنداسين ته تاريخ اسان کي ڪڏهن معاف نه ڪندي.سينئير صحافي ڊاڪٽر ايوب شيخ چيو ته اسان سنڌي ڪو به ڪم ڪرڻ ۾ دير ڪندا آهيون، شاهه لطيف تي به پهريان ٻين لکيو پوءِ ان تي اسان لکڻ شروع ڪيو ۽ ون يونٽ سانحي تي به ان ساڳي سستي کان ڪم ورتو ويو.

ٿر، ڪوهستان، ڪاڇي جو ڏڪار سنڌ حڪومت لاءِ ڀوائتو ٿي سگهي ٿو: هاري اسيمبلي

حيدرآباد (عوامي آواز نيوز) پاڪستان فشرفوڪ فورم پاران ڪوٺايل هاري اسيمبلي ٿر، ڪوهستان، ڪاڇي ۽ ساحلي علائقن ۾ وڌندڙ خوراڪ جي بحران واري خوف تي بحث ڪندي ان خدشي جو اظهار ڪيو آهي ته اها صورتحال ويجھي مستقبل ۾ خود سنڌ حڪومت لاءِ به ڀوائتي ٿي سگھي ٿي، هاري اسيمبلي سنڌ ۾ موجود اڻ برابري ۽ غير يقيني واري هارپي جي نظام، پاڻي جي لڳاتار کوٽ، سرڪار جي غلط پاليسين جي ڪري شهري ترقي جي نالي ۾ زرخيز زمين تي ٿيندڙ اڏاوت جي مخالفت ڪندي چيو ويو ته تازو سنڌ ۾ وسڪاري تي پوکي راهي ۽ چوپائي مال تي گذر ڪندڙ ماڻهن جي زندگي جي ڀيانڪ تصوير، خوراڪ جي کوٽ جي ڪري ٻارن ۽ عورتن ۾ بيماريون، موت ۽ چوپائي مال جو هيڏو نقصان اهو پيغام ڏين ٿا ته فوري طور مستقبل جي رٿابندي ڪري هن بحران کان بچي سگھجي ٿو، پنهنجي نوعيت ۾ مختلف هن ميڙ ۾ سانگھڙ، ڄامشوري، عمرڪوٽ، بدين ۽ حيدرآباد جي هارين، مهاڻن، پورهيتن جي حقن لاءِ آواز اٿاريندڙ سياسي ڪارڪنن ۽ سول سوسائٽي جي نمائندن شرڪت ڪئي ۽ پنهنجو ڪيس پيش ڪيو ته هو وسيلن جي اڻ هوند جي ڪري اهڙي ڏکي صورتحال ۾ ڪيئن زندگي گذاري رهيا آهن، ان موقعي تي اسيمبلي کي فشرفوڪ فورم جي چيئرمين محمد علي شاهه، آڪسفيم گرو ڪيمپين جي پروگرام مينيجر شهباز بخاري، ايڪشن ايڊ پاڪستان جي ريجنل مينيجر شاهجهان بلوچ، ايس پي او جي ريجنل مينيجر مصطفيٰ بلوچ، ذوالفقار هاليپوٽو، هاري اڳواڻن غلام علي لغاري، پنهل ساريو، فيض زرداري، يار محمد شيخ، اشفاق خاصخيلي، سعيد بلوچ، مصطفيٰ ميراڻي ۽ ٻين خطاب ڪيو. هن ميڙاڪي ۾ گڏيل قومن جي موسمي تبديلين جي ماهرن پاران ان بيان جي ڀرپور حمايت ڪئي وئي، جنهن ۾ چيو ويو ته سبز انقلاب زراعت کي موسمي  تبديلين جي خطري ۾ آڻي ڇڏيو آهي،  ان ڪري وقت جي تقاضا آهي ته نئين حڪمت عملي سان خوراڪ جي پيداوار جو متبادل نظام اختيار ڪيو وڃي، هن اسيمبلي خوراڪ جي وڌندڙ کوٽ کي آڏو رکندي اهو واضح ڪيو آهي ته سنڌ جون ڍنڍون پاڻي جي لڳاتار کوٽ جي ڪري يا ته سڪي ويون آهن يا زهريليون بڻجي ويون آهن ۽ اهي نه صرف انسانن کي مڇي، سبزيون، پيئڻ جو صاف پاڻي نٿيون مهيا ڪري سگھن، پر خود آبي ۽ جھنگلي جيوت لاءِ پڻ نقصانڪار ٿي ويون آهن، سمنڊ مان مڇي جا ذخيرا ختم ٿيندا پيا وڃن، ٻيلن جي تباهي جي ڪري سڄو اقتصادي ڍانچو متاثر ٿيو آهي، چراگاهه ختم ٿيڻ ڪري چوپائي مال جي معيشيت خطري ۾ آهي، جيڪو خود اڳي ٻهراڙين جي علائقن جي ماڻهن لاءِ خوراڪ جو اهم وسيلو هو، هاري اسيمبلي سنڌ حڪومت کان مطالبو ڪيو ته جيڪو کيڙي سو کائي فلسفي تحت حقيقي زرعي سڌارا آڻي وڏيراشاهي ختم ڪري زمينون صدين کان کيڙيندڙ هارين ۾ تقسيم ڪيون وڃن، سبز انقلاب جي نالي ۾ ڀاڻ ۽ زرعي دوائن جي استعمال سان زرعي زمينون سم ۽ ڪلر جي لپيٽ ۾ اچي ويون آهن، ان ڪري زرعي سڌارن جي نالي ۾ آيل تباهي جو ازالو ڪيو وڃي.

شهيد بشير قريشي جي ورسي لاءِ مزار ڀرسان جلسي گاهه تيار

پڪاري اوهان کي ٿڪا يار آهيون؛ وري ڪا نه ورندي رُنا يـــار آهيون،

سڀني کنيا ٿئي پنهنجي محبوبن جا نالا؛ اسين سنــڌ تنهنجو سڏائـــي ويٺاسيـــن.

رتوديرو (ت ر) شھيد بشير خان قريشي جي ٻئين ورسي جي حوالي سان رتوديرو ۾ تياريون مڪمل ڪيون ويون آھن. 7 پريل تي جسقم جي شھيد چيئرمين بشير خان قريشي جي ٻئين ورسي رتوديرو ۾ جسقم طرفان عقيدت ۽ احترام سان ملھائي ويندي. ان سلسلي ۾ جسقم ڪارڪنن رتوديرو شھر کي ڳاڙھن جھنڊن سان سينگاري ڇڏيو آھي جسقم جا جھنڊا ۽ بينر پلي ڪارڊ شھر جي روڊن، چوراھن تي لڳايا ويا آھن.. ان سلسلي ۾ جسقم جي مرڪزي جنرل سيڪريٽري امجد مھيسر جي صدارت ۾ جسقم جي ضلعي اڳواڻن جي گڏجاڻي ٿي جنھن ۾ ضلعي لاڙڪاڻي جي صدر ڊاڪٽر ممتاز شيخ، بشير جتوئي، شبير شر، زاھد ميراڻي، جساف اڳواڻ ذوھيب قريشي، باغي رحيم سومرو، يعقوب عارباڻي، بشير جوڻيجو سميت ڪارڪنن شرڪت ڪئي. صحافين سان ڳالھائيندي جساف جي مرڪزي اڳواڻ ذوھيب قريشي ۽ جسقم جي مرڪزي جنرل سيڪريٽري امجد ميھسر چيو ته 7 اپريل تي ڏينھن جو 10 ڏھين وڳي قرآن خواني مزار تي ڪرائي ويندي ۽ بعد ۾ خيرات جي ماني صبح کان شام تائين جاري رھندي. رات جو اٺين وڳي جسقم چيئرمين صنعان خان قريشي جي اڳواڻي ۾ شھيد بشير خان قريشي، شھيد مقصود قريشي ۽ شھيد سلمان وڌو جي مزارن تي حاضري ڀري دعا گھري مک تقريب ۾ شرڪت ڪندا. شھيد بشير خان قريشي جي مزار ڀرسان جلسي گاھ ٺاھي وئي آھي. جنھن ۾ لکين ماڻھن جي ويھڻ جو انتظام ڪيو ويو آھي. اسٽيج پنج سوءِ فوٽن تي مشتمل ھم چورس ٺاھي وئي آھي. پنج سوءُ کان به مٿي جسقم ڪارڪن سيڪيورٽي جا انتظام سنڀاليندا. جلسي ۾ شرڪت ڪندڙ ڪارڪنن جي لاءِ پاڻي جي سبيل جو به بندوبست ڪيو ويو آھي. مک تقريب رات اٺين وڳي شروع ڪئي ويندي جنھن کي جسقم جا مرڪزي اڳواڻ خطاب ڪندا.

شهيد بشير قريشي جي سڀاڻي ٻي ورسي، جلسو رٿيل

حيدرآباد (پ ر) جسقم چيئرمين  صنعان خان قريشي، ڊاڪٽر نياز  ڪالاڻي، ڪيهر انصاري، امجد مهيسر، عبدالله  سومرو، بشير خاصخيلي، ساگر حنيف بڙدي، نجف لغاري چيو آهي ته شهيد بشير خان قريشي، سنڌ جي قومي تحريڪ کي نوان رنگ ۽ ڍنگ ڏنا، سنڌ جي آجپي جي فڪر ۽ خيال کي عملي شڪل  ڏيندڙ بشير خان قريشي، سنڌ دشمن قوتن لاءِ اک ۾ ڪنڊو هو، پر خود بشير خان قريشي جا اهي لفظ تاريخ جو حصو آهن ته سنڌ دشمن قوتن لاءِ زندهه بشير خان شهيد بشير خان وڌيڪ خطرناڪ هوندو. اڄ سنڌ جا لکين غيرت مند ماڻهو شهيد بشير خان قريشي جي فڪر نظرئي ۽ جدوجهد کي حق ۽ سچ سمجهن ٿا، 7 اپريل سڀاڻي  رتو ديرو ۾ سنڌ دشمن قوتون ڏسنديون ته سندن مقصد ڪڏهن به ڪامياب ڪونه ٿيندا.

مشرف جو نالو اي سي ايل مان نه ڪڍڻ جو فيصلو، آئين تي عمل ٿيندو: وزيراعظم

اسلام آباد (بيورو+م ڊ) وفاقي حڪومت غداري ڪيس جي جوابدار اڳوڻي صدر پرويز مشرف جو نالو اي سي ايل مان نه ڪڍڻ جو فيصلو ڪيو آهي، جڏهن ته نواز ليگ مشرف جو نالو اي سي ايل مان ڪڍڻ يا نه ڪڍڻ جو اختيار وزيراعظم نواز شريف حوالي ڪري ڇڏيو آهي. خانگي ٽي وي جي رپورٽ موجب وفاقي گهرو وزارت قانوني ماهرن سان مشورا ڪرڻ کانپوءِ موقف اختيار ڪيو آهي ته پرويز مشرف جو نالو اي سي ايل ۾ عدالت جي حڪم تي شامل ڪيو ويو هو ۽ عدالتي حڪم کانسواءِ نه هٽايو ويندو. ٻئي طرف وزيراعظم نواز شريف جي صدارت هيٺ نواز ليگ جو مشاورتي اجلاس ٿيو، جنهن ۾ دفاع وارو وزير خواجه آصف، گهرو وزير چوڌري نثار علي، سڌ سماءَ وارو وزير پرويز رشيد، شاهد خاقان عباسي، اسحاق ڊار، احسن اقبال، سردار مهتاب، عرفان صديقي ۽ خواجه ظهير شريڪ ٿيا. اجلاس ۾ اڳوڻي صدر پرويز مشرف جو نالو اي سي ايل مان ڪڍڻ ۽ طالبان جي قيدين کي آزاد ڪرڻ جي حوالي سان غور ويچار ڪيو ويو. چوڌري نثار طالبان سان ڳالهين جي اڳڀرائي بابت آگاهه ڪيو. ان موقعي تي وزيراعظم نوازشريف سياسي قيادت کي اعتماد ۾ وٺندي چيو ته طالبان سان ڳالهيون جاري رکيون وڃن ۽ مطالبن تي غور ويچار ڪيو وڃي، ان سان گڏ حڪومت جو موقف به طالبان آڏو رکيو وڃي. ذريعن موجب مشرف جو نالو اي سي ايل مان ڪڍڻ جي چوڌري نثار علي، خواجه آصف، پرويز رشيد، احسن اقبال، شاهد خاقان عباسي ۽ سردار مهتاب مخالفت ڪئي ۽ موقف پيش ڪيو ته پرويز مشرف کي سزا ڏئي قانون جي ڀڃڪڙي جو باب بند ڪري سگهجي ٿو. هنن چيو ته جيڪڏهن پرويز مشرف پرڏيهه ويو ته ملڪ ۾ ڊيل جون ڳالهيون ٿينديون، جڏهن ته اجلاس ۾ شرڪت ڪندڙ ڪجهه اڳواڻن موقف رکيو ته مشرف معافي وٺي ته پوءِ ان جو نالو اي سي ايل مان ڪڍي سگهجي ٿو. ڇاڪاڻ ته هينئر ملڪ پهرين ئي سنگين چئلينجز کي منهن ڏئي پيو ان دوران وزيراعظم نوازشريف چيو ته ملڪ ۾ قانون سڀني لاءِ برابر آهي ۽ قانون جي حڪمراني هر صورت ۾ يقيني بڻائي ويندي ۽ آئين جي بالادستي کي برقرار رکيو ويندو. هن چيو ته ملڪ قانون جي حڪمراني تي هلي ڪري ترقي ڪري سگهي ٿو. ملڪ ۾ آزاد عدليه موجود آهي، عدالت جي هر فيصلي تي عمل ڪنداسين. هوڏانهن اڳوڻي صدر پرويز مشرف سان سندس وڪيل بئريسٽر فروغ نسيم اي ايف آءِ سي ۾ ملاقات ڪري غداري ڪيس ۽ پرڏيهه وڃڻ لاءِ درخواست تي تازي صورتحال کان آگاهه ڪيو. ڪالهه آرمڊ انسٽيٽيوٽ آف ڪارڊيالاجي جي 7 رڪني ميڊيڪل بورڊ، ميجر جنرل عمران مجيد جي سربراهي ۾ پرويز مشرف جو معائنو ڪيو، ان دوران ڊاڪٽرن ٻڌايو ته مشرف جي شگر ۽ ڪئلسٽرول ۾ اضافو ٿي رهيو آهي. ان ڪري کيس فارم هائوس وڃڻ جي اجازت نه ٿي ڏئي سگهجي. ان کان اڳ علاج دوران پرويز مشرف ميڊيڪل بورڊ تي زور ڀريو ته اسپتال ۾ سندس دم گهٽجي رهيو آهي، ان ڪري کيس چڪ شهزاد منتقل ڪيو وڃي. ڊاڪٽرن جي مشوري کانپوءِ پرويز مشرف کي سندس رشتيدارن حيات الله ۽ ٻين فارم هائوس منتقل نه ٿيڻ جو مشورو ڏنو.آرمي چيف وزير اعظم وٽ پهچي ويو، مشرف جي معاملي تي مشورا

اسلام آباد: آرمي چيف جنرل راحيلا شريف وزير اعظم سان ملاقات ڪري امن امان ۽ ملڪي مجموعي صورتحال تي غور ويچار ڪيو ملاقات ۾ آءِ ايس آءِ سربراهه ظهير السلام به موجود هو. ميڊيا رپورٽ موجب ملاقات ۾ پرويز مشرف جو نالو اي سي ايل مان ڪڍڻ ۽ ٻين معاملن تي به مشورا ڪيا ويا.

وزير اعظم سان آصف زرداري جو رابطو، مشرف معاملي تي غور

اسلام آباد: وزير اعظم نواز شريف سان اڳوڻي صدر ۽ پ پ  سربراهه آصف زرداري ٽيليفون تي رابطو ڪري سياسي صورتحال تي ڳالهه ٻولهه  ڪئي آهي. ٻنهي اڳواڻن مشرف معاملي تي غور ويچار ڪيو.

مشرف غداري ڪيس ۾ آمريڪا جو مداخلت نه ڪرڻ جو فيصلو

واشنگٽن (آن لائن) آمريڪا اڳوڻي پاڪستاني صدر جنرل (ر) پرويز مشرف خلاف غداري جي ڪيس ۾ فرد جرم عائد ٿيڻ تي ڪنهن به قدم کان انڪار ڪندي چيو آهي ته اهو اشو پاڪستاني آئين ۽ قانون تحت حل ٿيڻ گهرجي، پرڏيهي خابرو اداري جي رپورٽ موجب آمريڪي پرڏيهي کاتي جي ترجمان ميري هارف صحافين سان ڳالهائيندي چيو ته اسان پرويز مشرف خلاف قانوني ڪارروائي جي باري ۾ ڪابه پوزيشن نه وٺنداسين، هن چيو ته اهو معاملو پاڪستان جي آئين ۽ وقانون تحت حل ڪيو وڃي.

سنڌ ۾ غيرقانوني مدرسا ٺاهڻ ۽ قبائلين جي آمد روڪڻ جو حڪم

ڪراچي (رپورٽر) سنڌ پوليس سنڌ ۾ هندن جي عبادتگاهن ۽ مقدس آستانن تي حملن ۾ ٽين ڌر کي ملوث قرار ڏنو آهي، سنڌ جي وڏي وزير چيو آهي ته قبائلي علائقن مان سنڌ ايندڙ آءِ ڊي پيز بدامني جو اصل سبب آهن، اهڙن غيرقانوني ماڻهن  خلاف آپريشن ڪيو وڃي،  غيرقانوني مدرسن جي تعمير روڪي وڃي، ڪراچي ۾ آپريشن جي ڪري امن امان جي صورتحال ڪنٽرول ۾ آهي. ڪراچي ۾ ٽارگيٽڊ آپريشن، سنڌ جي ٻين علائقن ۾ مذهبي ڇڪتاڻ وارن واقعن بابت اجلاس سي ايم هائوس ۾ وڏي وزير جي صدارت هيٺ ٿيو. اجلاس ۾ بريفنگ ڏيندي آءِ جي سنڌ چيو ته سنڌ ۾ مذهبي نفرت پکيڙڻ پويان ٽين طاقت جو هٿ آهي، انهن جو پيڇو ڪري رهيا آهيون جلد کين منطقي انجام تائين پهچائينداسين، ٽارگيٽڊ ڪارروائين جي ڪري ئي لياري جي گينگسٽرس وٽ پاڻ ۾ صلح ڪرڻ کانسواءِ ڪو چارو نه هو. پر پوءِ به لياري جا ڪيترائي ڏوهاري مقابلن ۾ مارجي چڪا آهن يا وري گرفتار ڪيا ويا آهن. ايڊيشنل آءِ جي ڪراچي شاهد حيات چيو ته ٽارگيٽڊ آپريشن دوران هيستائين 9421 ڪيسن ۾ 11806 جوابدارن کي مختلف عدالتن ۾ چالان ڪيو ويو آهي. رڳو اي ٽي سي ڪورٽن ۾ 535 ڪيس هلي رهيا آهن جن مان 60 کي سزا ملي چڪي آهي، 270 جوابدار قتل، 165 ٽارگيٽ ڪلنگ، 171 ڌماڪيدار مادو رکڻ، 80 ڀُنگ لاءِ اغوا، 212 ڀتي خوري، 1233 ڌاڙي جي ڪيس ۾ گرفتار ڪيا ويا آهن. لياري ۾ 25 پوليس چوڪيون قائم ڪيون آهن. وڌيڪ 150 اهلڪار مقرر ڪيا پيا وڃن. ان موقعي تي مڪاني ادارن ۽ سڌ سماءُ واري وزير شرجيل انعام ميمڻ چيو ته ڪراچي ۾ غيرقانوني هائيڊرنٽس خلاف ڪارروائي ڪئي وئي آهي. پر پوءِ به پاڻي جي چوري جاري آهي. انهن خلاف قدم نه کنيو ويو ته پاڻي جي مسئلي تي امن امان جو وڏو مسئلو پيدا ٿي سگهي ٿو. اجلاس کي خطاب ڪندي سنڌ جي وڏي وزير سيد قائم علي شاهه چيو ته دهشتگردن، ٽارگيٽ ڪلنگ، ڀتاخوري ۽ ڀُنگ لاءِ اغوا جي جوابدارن خلاف ڪارروائي سبب ڪراچي ۾ امن امان جي صورتحال ڪنٽرول ۾ آهي. وڏي وزير مذهبي ۽ فرقيواراڻي انتهاپسندي جي پٺڀرائي ڪندڙ طاقتن جي نشاندهي ڪرڻ تي زور ڀريندي چيو ته سنڌ ۾ آءِ ڊي پيز جي اثر ۽ غيرقانوني مدرسن جي تعمير روڪي وڃي. وڏي وزير چيو ته غيرقانوني سمن جي رنڊڪن باوجود قانون لاڳو ڪندڙ ادارن ڪراچي ۾ امن قائم ڪرڻ لاءِ نمايان ڪارڪردگي ڏيکاري. سنگين ڏوهه گهٽجي ويا آهن ۽ ڪيس داخل ٿيڻ ۽ سزائن ۾ اضافو ٿيو آهي. هن چيو ته غيرقانوني سمن تي پابندي بنا ادارا بهتر ڪارڪردگي نه ٿا ڏيکاري سگهن، چيف سيڪريٽري نيشنل سيڪيورٽي جي ايندڙ اجلاس ۾ ان معاملي کي وفاقي حڪومت سامهون کڻي. وڏي وزير هندو برادري جي مذهبي جاين تي حملن جي مذمت ڪندي چيو ته ڪجهه عنصر مذهبي انتهاپسندي کي هٿي وٺرائي رهيا آهن جيڪي سنڌ ۾ امن امان، هم آهنگي ۽ ڀائيچاري واري فضا خراب ڪرڻ چاهين ٿا. انهن جو مقصد ناپاڪ سياسي مقصدن جي حاصلات آهي جنهن کي پ پ جي حڪومت عوام جي سهڪار سان ناڪام بڻائي ڇڏيندي. گهرو کاتو قانون لاڳو ڪندڙ ادارن جي سهڪار سان ملڪ دشمن عنصرن خلاف جامع رپورٽ جوڙي ته جيئن اهڙن عنصرن خلاف سخت ڪارروائي ڪئي وڃي. وڏي وزير قبائلي علائقن مان ايندڙ آءِ ڊي پيز جي وڌندڙ اثر جو سخت نوٽيس وٺندي چيو ته سنڌ واحد صوبو آهي جتي قبائلي علا.ئقن  مان آيلن ۽ غيرقانوني پرڏيهين جو وڏو انگ موجود آهي، 20 لک غيرقانوني پرڏيهي رڳو ڪراچي ۾ رهن پيا جيڪي ڏوهن جو اصل سبب آهن. هن آءِ جي سنڌ کي هدايت ڪئي ته قبائلي علائقن مان ايندڙ اهڙن غيرقانوني پرڏيهين خلاف ڪارروائي ڪئي وڃي ۽ صوبي ۾ غيرقانوني مدرسن جي تعمير روڪي وڃي، خاص طور تي ڪراچي ۽ حيدرآباد جي هر هڪ داخلي ۽ خارجي پوائنٽ تي چيڪنگ جو اثرائتو مڪينزم جوڙيو وڃي.

حيدرآباد ۾ مندر بعد هندن جي قبرستان تي حملو، قبرن کي باهه، 2 ڄڻا گرفتار

حيدرآباد: نئين دمبالي جا هندو مندرن تي حملن خلاف پريس ڪلب آڏو بک هڙتال تي ويٺا اهن

حيدرآباد (عوامي آواز نيوز) حيدرآباد جي سائيٽ واري علائقي ۾ ڳوٺ عدل نوناري سامهون هندو برداري جي  ڪارو ڪولهي  جي قبرستان تي انتهاپسندن حملو ڪري قبرن مٿان پيٽرول هاري ڪيترن ئي قبرن کي باهه ڏئي ساڙي ڇڏيو، شرپسندن ڪولهي برداري جي قبرن مٿان فائرنگ پڻ ڪئي، جڏهن ته شرپسندن ڪيترن ئي قبرن کي لتن سان ٿڏا هڻي انهن کي ڊاهي پٽ ڪري ڇڏيو ۽ ڪارروائي ڪرڻ بعد قبرستان ٻاهران بيٺل هڪ مزدا کي پڻ باهه ڏئي ساڙي ڇڏيو. هوسڙي ٿاڻي جي حد ۾ ٿيل اهڙي واقعي کانپوءِ سوين هندو برادري جا ماڻهو، گهرن کان نڪري آيا، جن ٽنڊومحمد خان روڊ تي احتجاجي مظاهرو ڪري ڌرڻو هنيو، جنهن سبب روڊ بند ٿي ويو، احتجاج ڪندڙ ڪولهي برادري جا ماڻهو پنهنجن پيارن جي قبرن جي بيحرمتي خلاف سخت نعريبازي ڪري رهيا هئا، اطلاع ملڻ تي پوليس جا وڏا اٽالا پڻ پهچي ويا. قبرستان کي سنڀاليندڙ بابو ڪولهي ”عوامي آواز“ سان ڳالهائيندي ٻڌايو ته موٽر سائيڪل تي سوار 3 هٿياربند قبرستان ۾ آيا ۽ قبرن جي بيحرمتي ڪري قبرن مٿان پيٽرول هاري قبرن کي باهه ڏئي ساڙي ڇڏيو، اهڙي ڪارروائي ڪندڙن کي منهن تي ٻٽ ٻڌل هئا، جيڪي  نوجوان نظر اچي رهيا هئا، ٻئي طرف واقعي واري جاءِ تي ڊي سي محمد نواز سوهو ۽ ايس ايس پي حيدرآباد پير فريد جان سرهندي پهتا، جن قبرستان جو دورو ڪري واقعي جا تفصيل ورتا. ان موقعي تي ڊي سي محمد نواز سوهو هندو برادري سان ڳالهيون ڪندي چيو ته هندن جي قبرستان ۽ مذهبي جاين تي حملو ڪرڻ مذمت جوڳو عمل آهي، اهڙي قسم جون حرڪتون امن امان جي صورتحال کي خراب ڪرڻ جي سازش آهي. هن هندو برادري جي ماڻهن کي خاطري ڪرائيندي چيو ته هندو برادري کي هر ممڪن تحفظ فراهم ڪيو ويندو. ڊي سي جي خاطري بعد ڪولهي برادري جي ماڻهن احتجاج ختم ڪيو. ٻئي طرف ايڊيشنل ڪمشنر حيدرآباد ٻڌايو ته قبضا مافيا قبرن کي باهه ڏيڻ جي ڪوشش ڪئي، ٻن جوابدارن کي گرفتار ڪيو ويو آهي.

ڪراچي ڪلفٽن جي رتنيشور مندر کي نقصان ڏيندڙ اڏاوتون نه ڪرڻ جو حڪم، انتظاميا طلب

ڪراچي (رپورٽر) سنڌ هاءِ ڪورٽ ڪلفٽن ڪراچي ۾ شري رتنيشور مهاديو مندر کي نقصان پهچائيندڙ اڏاوتون نه ڪرڻ جو حڪم ڏيندي سرڪاري عملدارن، بحريا ٽائون ۽ ڪلفٽن بورڊ کان جواب طلب ڪري ورتو آهي. سنڌ هاءِ ڪورٽ جي جسٽس عرفان سعادت خان ۽ جسٽس عبدالمالڪ گدي تي ٻڌل ٻه رڪني بينچ ڊاڪٽر سنجو ڪمار ۽ ڊاڪٽر رميش ڪمار جي 1500 سال پراڻي شري رتنيشور مهاديو کي نقصان پهچائڻ خلاف داخل درخواست جي شنوائي ڪئي. درخواست ۾ موقف اختيار ڪيو ويو آهي ته ڪراچي ڪلفٽن بن قاسم پارڪ ويجهو تجويز ڪيل انڊر پاس وٽ 1500 سال پراڻو مندر شري رتنيشور مهاديو مندر موجود آهي، جيڪو زمين اندر آهي، جنهن ۾ 200 کان وڌيڪ مورتيون آهن جن ۾ رام، سيتا، ڪالي ماتا ۽ هنو مان جون مورتيون شامل آهن، جتي روز هزارين ماڻهو پوڄا لاءِ اچن ٿا، بحريه ٽائون هن تاريخي مندر ويجهو اڏاوت شروع ڪري ڇڏي آهي، جنهن ڪري مندر کي نقصان پهچڻ جو انديشو آهي، اڏاوتن لاءِ 30 کان 40 فوٽ اونها کڏا کوٽيا پيا وڃن، جنهن سان مندر جي ڀتين کي نقصان پهچي چڪو آهي. عدالت اڏاوتون روڪڻ جو حڪم ڏنو وڃي. عدالت شنوائي ڪندي چيف سيڪريٽري سنڌ، ايڊمنسٽريٽر ڪراچي، بحريا ٽائون جي چيئرمين ۽ ڪينٽونمنٽ بورڊ ڪلفٽن جي سربراهه کي 7 اپريل تي طلب ڪندي نوٽيس جاري ڪري ڇڏيا. عدالت اهو به حڪم ڏنو ته اهڙي ڪا اڏاوت نه ڪئي وڃي، جنهن سان هن قديم مندر کي نقصان پهچي.

مندرن تي حملا روڪڻ لاءِ هندن ۽ مسلمانن کي هڪ ٿيڻو پوندو: اسدالله ڀٽو

حيدرآباد: جماعت اسلامي اڳواڻ اسدالله ڀٽو  پريس ڪانفرنس ڪري رهيو آهي

حيدرآباد (عوامي آواز نيوز) جماعت اسلامي سنڌ جي امير مولانا اسدالله ڀٽي سنڌ اندرمذهبي عبادت گاهن تي ٿيندڙ حملن جي واقعن جو پاڻ مرادو نوٽيس وٺڻ  جو سپريم ڪورٽ آف پاڪستان کان مطالبو ڪندي  چيو آهي ته سنڌ صوفين، اوليائن، پيرن، فقير ۽ شاهه عبداللطيف ڀٽائي جي ڌرتي آهي، سنڌ ۾ رهندڙ تمام مڪتب فڪر سان تعلق رکندڙماڻهو  سڀ ڀائر آهن، حيدرآباد جي ڪالي ماتا مندر تي حملو هڪ سوچيل سمجهيل سازش آهي، جيڪي ملڪ ۽اسلام جا دشمن آهن، اهي عناصر  مذهبي فساد ڪرائڻ چاهين ٿا اهڙن عناصرن کي سخت سزا ڏني وڃي. اهڙو اظهار هن ڪالهه ڪالي ماتا مندر تي ٿيل حملي واري هنڌ  جو دورو ڪرڻ بعد  جي او آر ڪالوني ۾ هندن جي معززشخصيت جئي ڪمار جي گهر تي پهچي صحافين سان ڳالهائيندي ڪيو. ان موقعي تي مولانا عبدالوحيد قريشي، شيخ شوڪت علي سميت جماعت اسلامي حيدرآباد جا اڳواڻ پڻ موجود هئا. مولانا اسدالله ڀٽو چيو ته مسجدن،گرجا گهرن، مندرن ۽ ٻين عبادت گاهن جي حفاظت ڪرڻ  حڪومت جي ذميواري آهي. هن چيو ته گذريل هڪ مهيني کان هندن جي مندرن تي حملا ٿي رهيا آهن، پر حڪمران واقعن تي ڪنٽرول ڪرڻ ۾ناڪام ٿي ويا آهن. هن چيو ته لطيف جي نگري ۾ رهندڙهندو، مسلم ۽ ٻين قومن کي انهن فساد ڪندڙن جو مقابلو ڪرڻ لاءِ هڪ آواز ٿيڻو پوندو، سنڌ ۾ امن تباهه ڪندڙن خلاف جدوجهد ڪرڻ جي ضرورت آهي. هندو برادري جي اڳواڻ جئي ڪمار چيو ته سنڌ ۾ هندن جي عبادت گاهن تي حملن سان هندو برادري ۾ عدم تحفظ جو احساس پيدا ٿي رهيو آهي. هن چيو ته واقعن ۾ ملوث جوابدارن کي گرفتار ڪري سزا نه ڏني وئي ته احتجاج ڪرڻ تي مجبور ٿي وينداسين.

ورقن جي بيحرمتي الزام تي ڌرم شالا ساڙي وئي: ڪمشنر لاڙڪاڻو

لاڙڪاڻو: سپريم ڪورٽ جي حڪم تي سيشن جج لاڙڪاڻو جي جوڊيشل انڪوائري ۾ ڪالهه ڌرم شالا واقعي ۾ ڪمشنر، ڊپٽي ڪمشنر ۽ ڊي آءِ جي لاڙڪاڻو پيش ٿي پنهنجا الڳ الڳ بيان رڪارڊ ڪرايا آهن.  ڪمشنر لاڙڪاڻو ڊاڪٽر سعيد احمد مڱڻيجو بيان ڏيندي چيو ته ڊپٽي ڪمشنر ۽ مان چانڊڪا ڪاليج جي فيسٽيول ۾ واقعي واري رات جو موجود هئاسين جتي ا طلاع مليو ته مراد واهڻ محلي ۾ هڪ هندو پاران مقدس ورقن جي مبينا بي حرمتي ڪئي وئي آهي ۽ شهر ۾ وڳوڙ ٿي ويو آهي ۽ مان ڊپٽي ڪمشنر کي ساڻ ڪري شهر ۾ نڪتاسين ۽ رائل روڊ ڌرم شالا وٽ پهچي ڏٺوسين ته ڌرم شالا کي باهه ڏنل هئي. فائر برگيڊ  طلب ڪري پنهنجي نگراني ۾ ڌرم شالا جي باهه وسرائي. ان وقت رينجرز ۽ پوليس جا اٽالا پڻ موجود هئا. حالتن تي ضابطو آڻڻ لاءِ پوليس ۽ رينجرز کي هاءِ الرٽ رکيو ويو ۽ شهر جو سڄي رات گشت پڻ ڪيوسين. جوڊيشل انڪوائري آڏو بيان رڪارڊ ڪرائيندي ڊي آءِ جي لاڙڪاڻو خادم حسين رند چيو ته  جئين ئي واقعي جي خبر پئي ته مراد واهڻ جي ڪرما باغ واري علائقي ۾ پهتس ته اڳواٽ اي ايس پي حيدري توقير پوليس اٽالن سان موجود هو ۽ ماڻهو ان وقت مڇريل هئا. هن ٻڌايو ته مقدس ورقن ساڙڻ جي الزام هيٺ آيل هندو کي پوليس سخت سڪيورٽي ڏئي گهر مان حراست ۾ ورتو، ڌرم شالا جي باهه واري واقعي بعد سڄي رات پوليس ۽ رينجرز اٽالن سان گڏ شهر ۾ گشت ڪندو رهيس ۽ جيئن ئي ايس ايس پي خالد مصطفيٰ ڪورائي صبح جو موڪل ختم ڪري پهتو ته سيڪيورٽي جا انتظام ان حوالي ڪيا ۽ پوليس عملدارن کي امن امان کي برقرار رکڻ لاءِ سختي سان هدايتون ڏنيون. هن ٻڌايو ته مقدس ورقن جي ساڙڻ ۽ ڌرم شالا کي باهه ڏيڻ واري واقعي جي انڪوائري هلي رهي آهي.

دمبالي واقعي ۾ گرفتار هندن جي ملاقات تي پابندي، والدين جو سماجي بائيڪاٽ، سامان جو وڪرو بند

بدين (رپورٽ: رزاق ڏنو کوسو) نئين دمبالي واقعي ۾ گرفتار ٽن هندو نوجوانن جي ملاقات بند ڪئي وئي. ڪيس جي فريادي مولوي ڳوٺ ۾ سندن وارثن کي کاڌ خوراڪ جي فراهمي بند ڪرائي ڇڏي. ڪالهه نئين دمبالي واقعي ۾ گرفتار هندو نوجوانن جا وارث اشوڪ جو والد چيتن ميگهواڙ ۽ نريش جو والد منگهو ميگهواڙ سينٽرل جيل حيدرآباد پنهنجي پٽن سان ملڻ لاءِ پهتا ته جيل انتظاميا سندن ملاقات ڪرائڻ کان انڪار ڪري ڇڏيو. جنهن سبب ٻنهي جا والد مايوس ٿي اکين مان ڳوڙها ڳاڙيندا واپس ڳوٺ موٽي آيا. هوڏانهن نئين دمبالي جي ڳوٺ پير سخي عثمان جي ان معاملي کانپوءِ واپارين گرفتار ٽنهي نوجوان جي وارثن کي سيڌو سامان ڏيڻ به بند ڪري ڇڏيو آهي. جڏهن ته فريادي ڌر جي خوف سبب هو ڳوٺ کان ٻاهر وڃي نه ٿا سگهن. هندو برادري انتظاميا کان گهر ڪئي آهي ته اسان پئسا ڏيڻ لاءِ تيار آهيون. انتظاميا خوراڪ اسان جي گهرن تائين پهچائي. اسان جا ٻچا فاقاڪشي ۾ مبتلا آهن. ذريعن عوامي آواز کي ٻڌايو ته ٽنهي نوجوانن کي گرفتار ڪرائيندڙ انتهاپسندن نئين دمبالي ۾ دڪاندارن ۽ واپارين کي ڌمڪيون ڏنيون آهن ته ڪنهن به هندن کي کاڌ خوراڪ جو سامان ڏنو ته ان کي هندن جو ساٿي سمجهيو ويندو. انهن ڌمڪين بعد سامان ڏيڻ بند ڪيو ويو آهي. 022

پير پٿوري جي ميلي ۾ سيڪيورٽي سخت ڪرڻ جو فيصلو، پوليس چوڪس

ڪنري (رپورٽ: وسرام مڪواڻا) فقير پار برهم جي آستاني سميت سنڌ جي مختلف علائقي مندرن ۽ هندن جي عبادتگاهن تي حملن ۽ بي حرمتي جي واقعن خلاف ڪنري ۾ ڪولهي اتحاد طرفان ڊاڪٽر چيتن، لکجي رام، کئنپال داس ڪولهي جي اڳواڻي ۾ احتجاج ڪيو ويو. هنن چيو ته سوچيل سمجهيل سازش تحت اهڙا واقعا ڪيا پيا وڃن پر اسان ڪنهن به سازش کي ڪامياب ٿيڻ نه ڏينداسين. واقعن ۾ ملوث جوابدارن کي گرفتار ڪري اسان کي تحفظ فراهم ڪري مندرن ۽ آستانن جي سيڪيورٽي ۾ اضافو ڪيو وڃي. هوڏانهن تعلقي ڪنري سميت ضلعي عمرڪوٽ ۾ مندرن آستانن ۽ گرجا گهرن جي سيڪيورٽي لاءِ حفاظتي انتظام سخت ڪيا ويا آهن. انهن علائقن ۾ گشت به تيز ڪري ڇڏيو آهي ۽ پير پٿورو جي ميلي ۾ به سيڪيورٽي وڌائڻ جو فيصلو ڪيو ويو آهي.

شهرين کي گرفتار ڪرڻ جا اختيار فوج حوالي، ن ليگ ۽ متحدا ۾ چڪريون

اسلام آباد (آن لائن) قومي اسيمبلي جي گهرو معاملن واري اسٽينڊنگ ڪميٽي تحفظ پاڪستان ترميمي بل جي اڪثريت جي زور تي منظوري ڏئي ڇڏي، جڏهن ته پيپلز پارٽي، تحريڪ انصاف، ايم ڪيو ايم، جماعت اسلامي ۽ جي يو آءِ (ف) بل جي مخالفت ڪئي. ان موقعي تي ن ليگ ۽ متحدا ميمبرن ۾ چڪريون به ٿيون، جي يو آءِ ف موقف اختيار ڪيو ته جيستائين وزيراعظم بل حوالي سان مولانا فضل الرحمان کي اعتماد ۾ نه وٺندو، ان جي مخالفت جاري رکي ويندي، جڏهن ته تحريڪ انصاف شهرين کي گرفتار ڪرڻ جا اختيار فوج کي ڏيڻ ۽ هڪ عدالت ۾ هلندڙ ڪيس بند ڪري ان کي خاص عدالت ۾ موڪلڻ ۽ ٻين شقن تي اختلاف ڪيو، جڏهن ته گهرو معاملن جي مملڪتي وزير بليغ الرحمان چيو ته آئين ۾ هر شهريءَ کي مڪمل تحفظ ڏنو ويو آهي. هي بل دهشتگردي خلاف ڪارروائي لاءِ آندو پيو وڃي، هر شهريءَ کي آرٽيڪل 10 تحت تحفظ مليل آهي. آئين ۾ ڳجهن ادارن طرفان ڪنهن شهريءَ کي کڻڻ بابت مڪمل طريقو ڏنل آهي. اڱاري ڏينهن ڪميٽي جي بند ڪمري ۾ اجلاس چيئرمين راڻي شميم جي صدارت ۾ ٿيو. ذريعن مطابق اجلاس دوران جڏهن ايم ڪيو ايم ميمبرن بل جي مخالفت ڪئي ته ن ليگ جي تهمينه دولتانه متحدا ميمبرن سان منهن ماري ڪندي چيو ته جڏهن به تحفظ پاڪستان جو بل سامهون آندو وڃي ٿو، متحدا ان جي مخالفت شروع ڪري ٿي ڇڏي، جنهن تي متحدا ميمبرن چيو ته: جڏهن به اهڙو ڪارو قانون آندو ويو آهي، اهو ايم ڪيو ايم خلاف ئي استعمال ٿيو آهي. ان بل ۾ شهرين کي تحفظ ڏيڻ بجاءِ قانون لاڳو ڪندڙ ادارن کي اها رعايت ڏني پئي وڃي ته، اهي جڏهن چاهين عام شهرين کي غائب ڪري ڇڏين. اجلاس بعد تحريڪ انصاف چيو ته، اسان کي ترميمي بل جي ڪيترين ئي شقن تي اعتراض آهي، ان ڪري اسان ان جي ڀرپور مخالفت ڪئي. جڏهن اهو بل قومي اسيمبليءَ ۾ آندو ويندو، تڏهن تحريڪ انصاف ان ۾ ڪيتريون ئي ترميمون تجويز ڪندي هٿياربند فورسن کي شهرين کي گرفتار ڪرڻ جو اختيار نه ڏيڻ گهرجي ۽ ان کانسواءِ جڏهن ڪنهن جو به ڪيس ڪنهن عدالت ۾ هلندڙ هجي ته اها ڪارروائي روڪي ڪيس خاص عدالت ڏانهن منتقل ڪيو ويندو. مملڪتي وزير چيو ته جڏهن ڪو ڪيس عدالت ۾ هلي رهيو هوندو ۽ ثابت ٿيندو ته اهو ڪيس دهشتگردي جو آهي ته ان کي خاص عدالت ڏانهن منتقل ڪيو ويندو.

ڀريا پوليس جسقم اڳواڻن جو قتل ڪيس ڳجهن ادارن خلاف داخل نه ڪيو، 13 اپريل تي ڌرڻي جو اعلان

نوشهرو فيروز/ڀريا سٽي/ٺاروشاهه (عوامي آواز نيوز) ڀريا سٽي پوليس جسقم اڳواڻ مقصود قريشي ۽ سلمان وڌو جو قتل ڪيس داخل نه ڪيو، جسقم پاران 13 اپريل تي ڀريا سٽي باءِ پاس تي ڌرڻي جو اعلان ڪيو آهي. پهرين اپريل تي جسقم جا هزارين ڪارڪن مرڪزي چيئرمين صنعان قريشي ڊاڪٽر نياز ڪالاڻي، امجد مهيسر، ڪيهر انصاري، زهيب قريشي ساگر حنيف بڙدي، عبدالله سومرو ۽ ٻيا پنهنجي شهيد ٿيل اڳواڻن مقصود قريشي ۽ سلمان وڌو جي ايف آءِ آر داخل ڪرائڻ جي لاءِ پهتا ته هنن ايس ايڇ او ڀريا سٽي کي پنهنجو موقف لکت ۾ پيش ڪيو، جنهن ۾ هنن گهر ڪئي ته مقصود احمد قريشي ۽ سلمان وڌو 20 مارچ جي ڏينهن 23 مارچ تي ڪراچي ۾ لڳندڙ ڌرڻي جي لاءِ سنڌ جي مختلف شهرن جا دورا ڪندي ميهڙ کان ڪراچي ڏانهن وڃي رهيا هئا ته رات جو ٻنهي جا موبائل فون بند ٿي ويا، جنهن کان پوءِ 21 مارچ تي ڀريا روڊ لنڪ روڊ تان سڙيل لاش مليا، جڏهن اهي لاش جناح اسپتال ڪراچي مان پوسٽ ماٽم ڪرايا ويا ته خبر پئي ته ٻنهي کي گوليون هڻي قتل ڪرڻ ساڙيو ويو، ان واقعي ۾ ملوث ڳجهن ادارن آءِ ايس آءِ انچارج دادو ۽ انچارج نوشهرو فيروز ملوث آهن، جڏهن ته اهڙو عمل ورجائڻ جي لاءِ گهرو کاتو به ملوث آهي، ڇو ته بشير خان قريشي جي قتل جي ايف آءِ آر آءِ ايس آءِ ۽ گهرو کاتي خلاف داخل ڪرائڻ جي لاءِ مقصود قريشي هاءِ ڪورٽ حيدرآباد وٽ پٽيشن داخل ڪرائي هئي، جنهن کانپوءِ کيس مسلسل ڌمڪيون ملي رهيون هيون. جسقم جي قيادت کي ايس ايڇ او ڀريا سٽي اهو چئي جواب ڏئي ڇڏيو ته اسان ڪنهن به ڳجهي اداري مٿان نالي سان ايف آءِ آر نٿا ڪٽي سگهون، جنهن کان پوءِ جسقم جي مرڪزي قيادت 5 ڪلاڪن تائين ٿاڻي تي ويٺل رهيي ۽ هزارين ڪارڪن پڻ موجود رهيا، ان دوران ڊي آءِ جي سکر شرجيل کر ۽ ايس پي نوشهرو فيروز نياز چانڊيو جي بار بار رابطن تي جسقم اڳواڻن ڳالهائڻ کان انڪار ڪندي احتجاج جو اعلان ڪيو. جسقم اڳواڻن آءِ ايس آءِ گهرو کاتي ۽ آءِ ايس آءِ دادو ۽ نوشهري جي انچارجن کي ڪيس ۾ ملوث ڄاڻائڻ چاهيو پر پوليس انڪار ڪيو، ان موقعي تي صنعان قريشي ۽ نياز ڪالاڻي چيو ته هو عالمي ادارن جو به در کڙڪائيندا. هنن چيو ته 13 اپريل تي هر صورت ۾ ڌرڻو هنيو ويندو.

جسقم اڳواڻن جي شهيدن جي يادگار تي حاضري، گلن جي ورکا

ڀريا روڊ: جسقم چيئرمين صنعان خان قريشي جي اڳواڻي ۾ سوين ڪارڪنن جو قافلو ڀريا روڊ ۾ جسقم اڳواڻن مقصود خان قريشي ۽ سلمان وڌو جي شهادت واري هنڌ پهتو، جتي هن شهيدن جي ياد ۾ جوڙايل يادگار تي گلن جي ورکا ڪرڻ بعد قومي جهنڊو پڻ ڦڙڪايو، ان موقعي تي سوين ڪارڪنن ڀريا سٽي پوليس خلاف جسقم اڳواڻن مقصود قريشي ۽ سلمان وڌو جي قتل جي ايف آءِ آر داخل نه ڪرڻ خلاف احتجاج ڪندي نعريبازي ڪئي. ان کان اڳ جسقم نوشهرو فيروز جي صدر علي فقير، جسقم يونٽ صدر مظهر شاهه جي اڳواڻي ۾ ڪارڪنن جي هڪ وڏي انگ مرڪزي اڳواڻن جو استقبال ڪيو.

ٿر ۾ ٻيهر موت جو رقص، 5 معصوم ٻارڙن سميت 7 ڄڻا فوت

مٺي/عمرڪوٽ (رپورٽ: اعجاز بجير+الياس ٿري) مٺي جي سول اسپتال ۾ 10 ڏينهن جي ڪويتا ۽ هڪ سال جي گوري، 12 ورهين جو شهمير ميهاري ڳوٺ واسي 15 ورهين جو اياز بجير حيدرآباد جي خانگي اسپتال ۾ فوت ۽ سول اسپتال مٺي کان ريفر ڪيل 25 سالن جو حاڪم اسپتال نيندي فوت ٿي ويو. جڏهن ڪيترائي مريض ضلعي جي سرڪاري توڙي خانگي اسپتال ۾ داخل آهن. هوڏانهن ڳوٺ آسراڙيو ۾ هڪ سال جو ٻارڙو رفيق پٽ دائود نهڙي ۽ محمد حسن ولد موچار سميجو فوت ٿي ويا، جڏهن ته ڳوٺ ۾ وڏي تعداد ۾ معصوم ٻارڙا توڙي عورتون بيماري ۾ ورتل آهن، جڏهن ته هيل تائين ڄاڻايل ڳوٺ تائين نه ڪا ڊاڪٽرن جي ٽيم پهتي آهي ۽ نه وري کاڌ خوراڪ ۽ امدادي سامان پهتو آهي، جڏهن ته ڪيترائي ڳوٺاڻا ڏڪار ۽ بک سبب ڳوٺ مان لڏ پلاڻ پڻ ڪري بئراجي علائقن ڏانهن هليا ويا آهن.

پوليس ۾ ڊيٿ اسڪواڊ آهن، ماريندڙ ياد رکن ته سندن به ٻچا آهن: الطاف حسين

ڪراچي (رپورٽر) ايم ڪيو ايم رابطا ڪميٽي ٻن ڪارڪنن جي قتل واري واقعي جي مذمت ڪندي چيو آهي ته اسان جي ڪارڪنن کي چونڊي چونڊي اغوا ڪري قتل ڪرڻ جي لاءِ پوليس ۽ قانون لاڳو ڪندڙ ادارن هڪ ڊيٿ اسڪواڊ جوڙي ورتو آهي، گذريل ڏينهن ڌاٻيجي مان هٿ آيل ٻن لاشن جي سڃاڻپ ايم ڪيو ايم ڪارڪن ثناءُ الله ۽ منصور احمد طور ٿيڻ بعد ايم ڪيو ايم رابطا ڪميٽي نائن زيرو تي هنگامي پريس ڪانفرنس گهرائي جنهن کي خطاب ڪندي حيدر عباس رضوي چيو ته گذريل ڏينهن سادن ڪپرن ۾ اهلڪار ٻنهي ڪارڪنن ثناءُ الله ۽ منصور کي گلستان جوهر مان کنڀي ويا ۽ بعد ۾ انهن جا لاش ڌاٻيجي مان نيشنل هاءِ وي تان مليا، هن چيو اسپتال انتظاميا مطابق ٻنهي ايم ڪيو ايم ڪارڪنن کي ويجهي کان گوليون هڻي قتل ڪيو ويو آهي، هن چيو ان کان اڳ به 3 ڪارڪنن کي اغوا ڪيو ويو بعد ۾ انهن جا لاش نوري آباد وٽان مليا هئا، آپريشن جي آڙ ۾ ئي متحده جي ڪارڪنن ۽ مهاجرن کي چونڊي چونڊي ماريو پيو وڃي، هن وڌيڪ چيو ته پوليس ۽ قانون لاڳو ڪندڙ ادارن هڪ ڊيٿ اسڪواد قائم ڪيو آهي جيڪو صرف ايم ڪيو ايم جي ڪارڪنن کي چونڊي چونڊي اغوا ڪرڻ بعد قتل ڪري ڇڏي ٿو.حڪومت کان سوال آهي ته ڇا هي آپريشن امن ڪرائڻ لاءِ آهي يا ان ڊيٿ اسڪواد هٿان ايم ڪيو ايم جي ڪارڪنن چونڊي چونڊي قتل ڪرائڻ لاءِ آهي، هنن حڪومت کان  مطالبو ڪيو ته ان ڊيٿ اسڪواڊ جي سربراهه جو پتو لڳايو وڃي ۽ انساني حقن جو تنظيمون ڪارڪنن جي قتل تي آواز اٿارين، هنن چيف جسٽس آف پاڪستان کان به مطالبو ڪيو ته ايم ڪيو ايم ڪارڪنن جي قتل جو نوٽيس وٺي انصاف ڏياري.  ٻئي طرف ايم ڪيو ايم سربراهه الطاف حسين چيو آهي ته عدالتن کان مٿانهن قتلن تي پوري قوم فڪرمند آهي، ايم ڪيو ايم جي ڪارڪنن ۽ همدردن کي چوندي چونڊي قتل ڪرڻ جي سخت لفظن ۾ مذمت ڪيون ٿا، لنڊن مان جاري ڪيل پنهنجي بيان ۾ الطاف حسين چيو ته ايم ڪيو ايم ڪارڪن ثناءُ الله ۽ همدرد منصور احمد جي عدالت کان مٿانهين قتل جو فوري طور تي نوٽيس ورتو وڃي. ميڊيا موجب الطاف حسين اهو به چيو ته ڊيٿ اسڪواڊ وارا ياد رکن ته سندن به ٻچا آهن.

ڪراچي جا 2 نوجوان ڌاٻيجي ۾ هٿ پير ٻڌي قتل، ايم ڪيو ايم ڪارڪنن طور سڃاڻپ

گهارو (ن ع آ) ڌاٻيجي ڀرسان ڪراچيءَ جي ٻن نوجوانن جا هٿ پير ٻڌل ۽ گوليون لڳل لاش هٿ، ٻنهي نوجوانن جي سڃاڻپ ڪراچي واسي منصور احمد ۽ ثناءُالله طور ٿي ويئي، ڌاٻيجي پوليس اطلاع تي قومي شاهراهه ڀرسان ٻن نوجوانن جا هٿ پير ٻڌل ۽ گوليون لڳل لاش هٿ ڪيا آهن. ڌاٻيجي پوليس موجب ٻنهي کي هٿ پير ۽ اکيون ٻڌي ويجهي کان گوليون هنيون ويون آهن، لاش کڻڻ وقت رت وهي رهيو هو ۽ جاءِ واردات تان پسٽل جي گولين جا کول پڻ هٿ ڪيا ويا آهن، جنهن مان ظاهر ٿئي ٿو ته نوجوانن کي اتي ئي گوليون هڻي قتل ڪيو ويو آهي. ٻنهي جي کيسي مان مليل شناختي ڪارڊن مان منصور احمد ولد عبدالخالق گلشن اقبال ۽ ثناءُالله ولد حبيب الله شاهه فيصل ڪالوني جي رهائشي طور سڃاڻپ ٿي آهي. لاشن کي پوسٽ مارٽم لاءِ سول اسپتال مڪلي نيو ويو، جتي متحده اڳواڻن ۽ ڪارڪنن جو وڏو انگ پهچي ويو. پوسٽ مارٽم ۾ ڊاڪٽرن ٻڌايو آهي ته ٻنهي کي ويجهي کان 3-3 گوليون لڳل آهن ۽ ٻنهي نوجوانن کي رات جي آخري پهر ۾ قتل ڪيو ويو آهي. پوسٽ مارٽم بعد لاش وارثن حوالي ڪيا ويا آهن. ايم ڪيو ايم جو چوڻ آهي ته ٻئي اسان جا ڪارڪن آهن، جن کي کنڀي قتل ڪيو ويو آهي.

سنڌ يونيورسٽي ۾ ٻئي ڏينهن به ڇڪتاڻ، رينجرز ۽ پوليس جو گشت، 27 شاگردن تي ڪيس داخل، 16 جي ضمانت منظور

ڄام شورو: يونيورسٽي جا شاگرد   لاڪ اپ آهن

ڄامشور (عوامي آواز نيوز) سنڌ يونيورسٽي ڄامشورو ۾ شاگردن ۽ پوليس، رينجرز ۾ ٿيل ڇڪتاڻ ۽ گرفتاريون ڪرڻ ۽ ڪيس داخل ڪرڻ بعد ٻئي ڏينهن به يونيورسٽي ۾ سخت ڇڪتاڻ ۽ خوف حراس واري صورتحال رهي صبح سان وڏي  تعداد ۾ پوليس ۽ رينجرز جو  جٿا ڪئمپس ۾ پهتا جيڪي  مک چوراهن ڊپارٽمينٽن جي اڳيان زيروپوائنٽ، آرٽس فيڪلٽي آءِ ٽي  ۽ هاسٽلن جي مک گيٽ تي  پڪٽون مقرر ڪندي اهلڪارن کي الرٽ ڪيو ويو ۽ يونيورسٽي ۾ داخل ٿيندڙ مارئي هاسٽل ۽ سنڌالاجي وارن رستن تي سيڪيورٽي گارڊن سان گڏ اهلڪارن کي مقرر ڪيو ويو  يونيورسٽي ۾ داخل ٿيندڙ استادن ، شاگردن جي گاڏين جون تلاشي وٺڻ بعد کين اندر ڇڏيو پئي ويو ۽ پوليس رينجرز جي گاڏين ۾ قافلي جي صورت ۾ ڪئمپس اندر سڄو ڏينهن گشت جاري ۽ گاڏين ۾ اهلڪار الرٽ رهيا جنهن  سبب تعليمي اداري ۾ ڏهڪاءُ  وارو ماحول برپا هيو  يونيورسٽي ۾ فورسز پاران شاگردن کي گڏ توڙي جٿي جي صورت ۾ نه هلڻ ڏنو ۽ نه ئي گڏجي ويهڻ توڙي بيهڻ ڏنو جنهن ڪري شاگرد ڇڙوڇڙ رهيا .هوڏانهن  لاٺي چارج تشدد شيلنگ ۽ فائرنگ بعد گرفتار ڪيل شاگرد اڳواڻن، شاگردن ۽ قومي ڪارڪنن خلاف  گذريل رات دير سان ڄامشورو ٿاڻي تي سرڪار جي فرياد تي  هل هنگاموڪرڻ، ڊيوٽي اٽڪاءُ ۽ ناحق روڊ بند ڪرڻ جي قلمن هيٺ ڪيس داخل ڪيو ويو آهي. ڄامشورو  شهر جي پوليس پوسٽ جي انچارج اي ايس آءِ ذوالفقار علي اوڍاڻو  جي فرياد تي گناهه نمبر  54/14 تحت هل هنگامو، ڊيوٽي اٽڪاءُ، ۽ ناحق روڊ بلاڪ ڪرڻ جي قلمن ، تحت 27 شاگرد اڳواڻن  مان 16 ڄڻن جي ضمانت منظور ڪئي وئي، 11 شاگردن کي رمانڊ تي نارا جيل موڪليو ويو، شاگردن ۽ قومي ڪارڪنن تي ڪيس داخل ڪيو ويو آهي  ڪيس ۾  ظفرعلي ميمڻ، گل بهار لاکو، غلام سرورگورياڻي، عرفان چانڊيو، حيدرعلي حاجاڻو،اميرسولنگي،علي اڪبرکوسو،شهبازعلي عباسي، با بوعلي سومرو،شهبان علي حاجاڻو،طالب ميمڻ،مجاهد ٻگهيو،نورحسن بروهي،غلام سرور بڙدي،اياز مري،مير انعام جتوئي،جمن ميمڻ،احمد حسين بروهي،تصدق پنهور،شفقت علي ابڙو،منير احمد نظاماڻي،ابرار علي،مينهون خان هنگورو،ظهير جمالي،لعل شاه، مرتضي رند  کي  جوابدار ڄاڻايو ويو آهي  جن کي   ڄامشورو پوليس قيدين کي  کڻندڙ بڪتربند مزدا گهرائي سڀني شاگردن کي  پوليس جي سخت پهري هيٺ ايس ايڇ او ڄامشورو پير الهه بچايو جي اڳواڻي ۾ پوليس ڄامشورو جي سيڪنڊ سول جج ڪوٽڙي جي عدالت ۾ پيش ڪيو ، جتي عدالت سڳوري سڀني قومي ڪارڪنن  جي ضمانت منظور ڪندي کين آزاد ڪري  ڇڏيو.هوڏانهن جساف آريسر طرفان 4 اپريل تي جساف جي مرڪزي نائب صدر مير انعام جتوئي جي گرفتاري ۽ سنڌ جي تعليمي ادارن ۾ رينجرز جي مداخلت خلاف سڄي سنڌ ۾ مظاهرن جو اعلان ڪيو ويو آهي. جساف مرڪزي باڊي جو اجلاس جساف جي مرڪزي صدر عرفان چانڊيو جي صدارت ۾ حيدرآباد ۾ ٿي گذريو. جنهن ۾ راجا ڏاهر، جاويد وڪو، عبدالڪريم شر ۽ ٻين اڳواڻن شرڪت ڪئي. اجلاس ۾ تنظيمي صورتحال جو جائزو ورتو ويو. جڏهن ته ڄام شورو ۾ سنڌي شاگردن جي مٿان رينجرز ۽ پوليس جي وحشياڻي تشدد ۽ گرفتار ڪيل جساف مرڪزي نائب صدر مير انعام جتوئي ۽ ٻين سنڌي شاگردن تي ڪوڙا ڪيس داخل ڪرڻ جي سخت مذمت ڪئي. اجلاس ۾ فيصلو ڪيو ويو ته 4 اپريل جمعي جي ڏينهن سڄي سنڌ اندر جساف جي مرڪزي نائب صدر مير انعام جتوئي ۽ ٻين جي اڳواڻن جي گرفتارين ۽ سنڌ جي تعليمي ادارن ۾ رينجرز جي مداخلت خلاف احتجاجي مظاهرا ڪري ڌرڻا هنيا ويندا. ٻئي طرف ميهڙ ۾ جساف جسمم جي ڪارڪنن امين سنڌي، برڪت علي جي اڳواڻي ۾ سنڌ يونيورسٽي ۾ شاگردن ۽ شاگردياڻين هٿان تشدد ڪرڻ خلاف ڊگري ڪاليج ميهڙ کان پريس ڪلب تائين احتجاجي مظاهرو ڪيو. اڳواڻن چيو ته سنڌ يونيورسٽي ۾ پرامن شاگردن ۽ شاگردياڻين مٿان تشدد چنگيزيت جي ياد تازي ڪري ڇڏي آهي. پرامن سياسي پروگرام کي پوليس ۽ رينجرز جنگ جو ميدان بڻائي ڇڏيو. هنن مطالبو ڪيو ته تعليمي ادارن مان رينجرز کي ڪڍيو وڃي. هوڏانهن ڪميونسٽ پارٽي آف پاڪستان جي صوبائي سيڪريٽري ڪامريد اقبال پنهنجي بيان ۾ چيو ته يونيورسٽي ۾ شاگردن تي رينجرز ۽ پوليس جي تشدد ۽ گرفتارين مان ثابت ٿي ويو  آهي ته يونيورسٽي انتظاميا مادر علمي کي فوجي ڇانوڻي بڻائي ڇڏيو آهي.هن مطالبو ڪيو ته تعليمي ماحول برقرار رکڻ لاءِ رينجرز ۽ پوليس کي يونيورسٽي مان نيڪالي ڏني وڃي.

خالد سومري تي حملي خلاف لاڙڪاڻي ۾ شٽر بند هڙتال، چڪريون، مختلف شهرن ۾ احتجاج

ڪراچي (عوامي آواز نيوز) گذريل اڱاري واري رات دير سان جي يو آءِ سنڌ جي سيڪريٽري جنرل ۽ اڳوڻي سينيٽر ڊاڪٽر خالد محمود سومرو مٿان ٿيل قاتلاڻي حملي خلاف جي يو آءِ جا سوين ڪارڪن روڊن تي نڪري آيا، شهر ۾ سخت احتجاج، شٽربند هڙتال، ڪارڪنن ۽ رينجرز اهلڪارن سان چڪريون، مبينا طور رينجرز جي يو آءِ جا 11 ڪارڪن گرفتار ڪري ورتا، جي يو آءِ جا ڪارڪن رينجرز خلاف مارڪيٽ ٿاڻي تي فرياد داخل ڪرائڻ لاءِ پهتا پر پوليس فرياد وٺڻ کان انڪار ڪري ڇڏيو آهي. ان سلسلي گذريل اڱاري واري رات دير سان لاڙڪاڻي شهر ٻاهگران وليد ٿاڻي جي حد ڪامرس ڪاليج لڳ جي يو آءِ جو صوبائي سيڪريٽري جنرل ۽ اڳوڻي سينيٽر ڊاڪٽر خالد محمود سومرو مٿان هٿياربندن قاتلاڻو حملو ڪيو، جنهن ۾ هو معجزانه طور تي پنهنجي پٽن سميت بچي ويو. جيئن ئي واقعي جي خبر جي يو آءِ جي ڪارڪنن کي پئي ته سوين ڪارڪن ڏنڍا کڻي روڊن تي نڪري آيا، جنهن ڪري شهر جي ريشم گلي، بندر روڊ، گجڻ پور چوڪ، نئون ديرو چوڪ، رائل روڊ، پاڪستاني چوڪ، اسٽيشن روڊ، باقراڻي روڊ سميت شهر جا ڪاروباري مرڪز اک ڇنڀ ۾ بند ٿي ويا. شهر جا پيٽرول پمپ ۽ سي اين جي اسٽيشنون پڻ بند ٿي ويون. جي يو آءِ جا ڪارڪن ڏنڍا کڻي سڄي شهر ۾ گشت ڪندا رهيا، جنهن بعد رينجرز ۽ پوليس جا اٽالا پهچي ويا، رينجرز جي اهلڪارن جي يو آءِ جي ڪارڪنن کي احتجاج کان روڪيو جنهن کانپوءِ چڪريون شروع ٿي ويون، ڪارڪنن تي جناح باغ چوڪ، پاڪستاني چوڪ ۽ ٻين هنڌن تي لاٺي چارج ڪئي وئي، جنهن جي نتيجي ۾ اعجاز احمد چاچڙ، زبير احمد ڀٽو، صدام حسين لنجار، محمد ابراهيم ابڙو، عبدالوحيد جاگيراڻي زخمي ٿي پيا، رينجرز اهلڪارن مبينا طور جي يو آءِ جي ضلعي جنرل سيڪريٽري محبت کهڙو سميت 12 ڪارڪنن کي گرفتار ڪري ورتو آهي، بعد ۾ محبت کهڙو کي آزاد ڪيو ويو جنهن کانپوءِ وڏي تعداد ۾ جي يو آءِ جا ڪارڪن جناح باغ چوڪ تي گڏ ٿي ويا، جتي سخت تقريرون ڪيون ويون ۽ چيو ويو ته ڊاڪٽر خالد محمود سومرو مٿان قاتلاڻو حملو ڪندڙ جوابدارن کي فوري طور تي گرفتار ڪري سخت سزا ڏني وڃي، جنهن کانپوءِ ڊاڪٽر خالد محمود سومرو جي پٽن سميت ڪارڪن مارڪيٽ ٿاڻي تي پهتا، جن مارڪيٽ ٿاڻي جي پوليس کي چيو ته اسان جي ڪارڪنن مٿان رينجرس اهلڪارن بدترين تشدد ڪيو آهي جن مٿان ڪيس داخل ڪيو وڃي، مارڪيٽ پوليس ڪيس داخل ڪرڻ کان انڪار ڪري ڇڏيو آهي. هوڏانهن جي يو آءِ اڳواڻ ڊاڪٽر خالد محمود سومرو چيو ته جن منهنجي مٿان حملو ڪيو، اهي ڦورو نه هئا جن مونکان پهريان ٻن گاڏي کي ڇڏي ڏنو ۽ جيئن ئي مان پهتس ته انهن چيو ته ڊاڪٽر ان گاڏيءَ ۾ آهي ته فائرنگ شروع ڪئي ۽ منهنجي به گن مين فائرنگ شروع ڪري ڏني، جنهن کانپوءِ شديد فائرنگ شروع ٿي وئي، اسان تي حملا ٽارگيٽ ڪري ڪيا پيا وڃن، اسان جا ڪارڪن هڪ اداري طرفان کنڀيا ويا آهن، جن خلاف اسان سگهارو احتجاج ڪيو ۽ اسان جو حڪومت خلاف به احتجاج هلندڙ آهي جنهن ڪري اهڙا واقعا پيش اچي رهيا آهن. رينجرز اسان جي پرامن احتجاج ڪندڙ ڪارڪنن مٿان بدترين تشدد ڪيو آهي، جنهن جي مذمت ڪريون ٿا. ٻئي طرف اڳواڻ تي حملي خلاف جي يو آءِ ڪارڪنن حيدرآباد، سکر، ڄام شوري، گهوٽڪي، شڪارپور، مٽياري، قمبر، سڪرنڊ،فيض گنج، مدئجي، ڳڙهي خيرو، ڏهرڪي، گهوڙاٻاري، پني عاقل ۽ چڪ ۾ احتجاجي مظاهرا ڪيا. جڏهن ته جماعت اسلامي جي اطلاعات سيڪريٽري مجاهد چني ڊاڪٽر خالد محمود سومري تي حملي جي سخت لفظن ۾مذمت ڪندي حملي ڪندڙن جي گرفتاري جو مطالبو ڪيو. 

نظرياتي سياست ذريعي انتهاپسنديءَ جي رستي روڪ، بنياد پرست سنڌ تي قبضو ڪرڻ گهرن ٿا: خالق جوڻيجو

حيدرآباد: جسم سربراهه خالق جوڻيجو سيمينار کي خطاب ڪري رهيو آهي

ڪراچي/حيدرآباد/سکر (عوامي آواز نيوز) سنڌ جي قومپرستن، کاٻي ڌر جي اڳواڻن ۽ ساڃاهه وندن چيو آهي ته نظرياتي سياست کي وڌيڪ مضبوط ڪري سنڌ ۾ وڌندڙ مذهبي انتهاپسندي کي روڪي سگهجي ٿو، سنڌ پنهنجي اصل حيثيت جي بحاليءَ کان محروم آهي، سنڌ تاريخ جي خطرناڪ صورتحال ۾ داخل ٿي چڪي آهي، اهڙي صورتحال ۾سنڌ سان محبت ڪندڙ ڌرين کي نئين سري سان جائزو وٺي اڳتي وڌڻو پوندو. اهڙو اظهار هنن ڪالهه حيدرآباد پريس ڪلب ۾ جيئي سنڌ محاذ پاران پهرين اپريل سنڌ جي بمبئي کان آزادي واري ڏهاڙي جي موقعي تي ” سنڌ ۽ قومي حق خوداراديت“ جي عنوان سان ڪوٺايل سيمينار کي خطاب ڪندي ڪيو. ان موقعي تي جيئي سنڌ محاذ جي چيئرمين عبدالخالق جوڻيجي چيو ته سنڌ جي بمبئي کان علحيدگي واري جدوجهد وڃايل سنڌ جي واپسيءَ واري جدوجهد جي شروعات هئي، اسان اڃا تائين پنهنجي وطن جي اها حيثيت بحال نه ڪرائي سگهيا آهيون. هن چيو ته سنڌ ۾ انتهاپسندي وڌائڻ جو مقصد سنڌ تي قبضو ڪري سنڌ کي دنيا آڏو هڪ مذهب جو ملڪ ڪري ڏيکارڻ واري سازش آهي ته جيئن اهي سنڌ دشمن ڌريون دنيا کي اهو ڏيکاري سگهن ته سنڌ تي ڪنهن به روپلي يا هيمون جو ڪو به حق ناهي. هن چيو ته هميشه هن رياست ۾ پنجاب جي مفادن جي ڳالهه ڪئي وئي آهي، هيءَ رياست 23 مارچ واري پنهنجي قرارداد کان پهرين ڏينهن ئي ڦري وئي هئي. هن چيو ته اسان کي هاڻ رڳو دعوائون نه ڪرڻ گهرجن، اسان کي پنهنجو پاڻ ۽ قومي تحريڪ جو به جائزو وٺڻ گهرجي، سنڌ هن وقت خطرناڪ صورتحال ۾ آهي، ان جي وجود کي خطرو آهي، ان صورتحال ۾ اسان کي پنهنجون اندروني صفون درست ڪرڻيون پونديون، نظرياتي هٿيار کي هٿ ۾ کڻڻو پوندو. هن تجويز ڏيندي چيو ته سنڌي ماڻهن کان هن رياست بابت نئين سري سان راءِ ورتي وڃي ته ڇا هو هن غلامي واري صورتحال ۾ رهڻ گهرن ٿا يا نه. دانشور جامي چانڊيو چيو ته سنڌ جي جديد تاريخ ۾سنڌ جي بمبئي کان آزادي وارو ڏينهن خاص اهميت رکي ٿو. هن چيو ته سنڌ ۾ سياسي شعور جي سڄاڳي واري شروعات به بمبئي کان سنڌ کي الڳ ڪرڻ واري تحريڪ کان ٿي، سنڌ اندر منظم سياسي سرگرميون به ان دور ۾ ٿيون. هن چيو ته سنڌ جي سياسي شعور ۾طاقت جو توازن وڌائڻو پوندو، اسان کي پنهنجي تاريخ جو نئين سري سان معائنو ڪري ٻيهر سوچڻو پوندو. عوامي ورڪرز پارٽي سنڌ جي جنرل سيڪريٽري ڪامريڊ بخشل ٿلهي چيو ته جديد سنڌ کي سمجهڻ جي لاءِ عالمي صورتحال کي سمجهڻو پوندو، ماضيءَ جي مظلوم قومن جي سٺين روايتن کي وري ورجائڻ جي ضرورت آهي. هن چيو ته غلاميءَ خلاف جدوجهد جو بنياد عوامي طاقت ۾ آهي، سنڌ جي قومي تحريڪ کي جاگيرداريءَ خلاف ويڙهه ڪرڻي پوندي، قومي تحريڪ اندر عورتن، پورهيتن، مزدورن ۽ شاگردن جي شموليت کي وڌائڻو پوندو. ڪميونسٽ پارٽي جي اڳواڻ ڪامريڊ اقبال چيو ته سنڌ ۾ سعودي ارب جي سوچ کي هٿي ڏني پئي وڃي، پرامن ۽ سيڪيولر سنڌ تي داغ لڳائڻ جي ڪوشش ڪئي پئي وڃي. وطن دوست انقلابي پارٽي جي اڳواڻ ڪامريڊ محمد خان احمداڻي چيو ته سنڌ بمبئي کان آزادي بعد ٻئي هنڌ ڦاسي پئي آهي. هن چيو ته سنڌ ۾ مذهبي دهشتگرد ڪارروايون ڪري هٿيار کڻي هندن جي گهرن تي چڙهايون ڪري رهيا آهن. جيئي سنڌ محاذ جي اڳواڻ هاشم کوسي چيو ته نظرياتي سياست کي هٿي ڏيڻ جي ضرورت آهي، اشوز جي سياست ڪرڻ بدران مستقل مزاجي واري جدوجهد ڪرڻ کي پنهنجي ترجيح بڻائڻو پوندو. ٻئي پاسي جيئي سنڌ محاذ جي سڏ تي حيدرآباد، ميرپورخاص، موري، ٺري ميرواهه، اوٻاوڙي، قمبر ۽ شهرن ۾ ”قومي حق خوداراديت“ ريليون ڪڍيون. ريلين کي ظهور لغاري، گل محمد ڳورڙ، مجيد ٻگهيي، تاج بلومنظور خاصخيلي، انيس احمد، محمد خان چانڊيي، وزير فرهاد سولنگي، يونس راهو، حفيظ شيخ، آزاد گل چانڊيي، انور سولنگي، صالح لاشاري، قمرالدين، ثناءُ الله، راجا ڏاهرعلي نواز شر، ياسين سنڌي، حبيب ويسر، جاويد شر ۽ ٻين خطاب ڪيو.

لاڙڪاڻي بعد حيدرآباد ۾ مندر کي باهه، هندو برادري جو ڌرڻو، ايس ايڇ او معطل

لاڙڪاڻي بعد حيدرآباد ۾ مندر کي باهه، هندو برادري جو ڌرڻو، ايس ايڇ او معطل

حيدرآباد (عوامي آواز نيوز) حيدرآباد جي سائيٽ ٿاڻي جي حد فتح چوڪ وٽ 6 سئوکان وڌيڪ گهرن تي مشتمل ميگهواڙ برادري جي ڪالي ماتا ڪالوني ۾ قائم تاريخي هنومان جي مندر وٽ ڪالهه صبح جو 6 کان 7 وڳي دوران هڪ سلور رنگ جي ڪرولا بنا نمبر پليٽ جي ڪار ۾ سوار 4 نامعلوم انتهاپسند هٿيار ساڻ  ڪري پهتا، جن مندر ۾ داخل ٿي مندر ۾موجود مورتي کي ڊاهي ٽوڙ ڦوڙ ڪري گاسليٽ هاري مندر کي باهه ڏني ۽ فرار ٿي ويا، جنهن کانپوءِ هندو برادري جا سوين ماڻهو پنهنجي مقدس عبادتگاهه وٽ جمع ٿي ويا، جن حيدرآباد-ٽنڊو محمد خان روڊ تي احتجاجي مظاهرو ڪندي ڌرڻو هڻي ٽائرن کي باهيون ڏئي روڊ بلاڪ ڪري ڇڏيو، مظاهري ۾ شامل هندو برادري جي سوين ماڻهن عورتن ۽ ٻارڙن پنهنجي عبادتگاهه جي بيحرمتي ڪرڻ خلاف سخت نعريبازي ڪئي. ان حوالي سان هندو برداري جي ماڻهن ”عوامي آواز“ سان ڳالهائيندي ٻڌايو ته ڄاڻايل مندر صبح 5 وڳي کان کلندو آهي، جنهن ۾هندو برداري جا ماڻهو صبح جو عبادت ڪرڻ کانپوءِ پنهنجن گهرن کان پورهيو ڪرڻ لاءِ نڪري ويندا آهن. هنن چيو ته صبح 6 کان 7 وڳي دوران ڪار ۾ سوار ماڻهو مندر ۾ داخل ٿيا ۽ مندر ۾ ٽوڙ ڦوڙ ڪري هنومان جي مورتي کي ڪيرائي گاسليٽ هاري مندر کي باهه ڏئي فرار ٿي ويا. هنن چيو ته مندر کي باهه ڏيندڙ ماڻهن کي ڏسندڙ نينگر درشن کي هٿياربند انتهاپسندن رڙيون ڪرڻ کان روڪي ورتو ۽ هو آساني سان فرار ٿي ويا. هنن چيو ته اسان سان وڏو ظلم ٿيو آهي، مقدس جاين کي نشانو بڻايو پيو وڃي، مقدس جاءِ کي ساڙڻ وارا انسان ناهن، ڌرم سان ڇيڙ ڇاڙ ڪري ڪريل حرڪت ڪئي وئي آهي، اهڙن ماڻهن کي گرفتار ڪري سخت سزا ڏني وڃي. ٻئي طرف اطلاع ملڻ تي پوليس پهچي واقعي واري هنڌ جو معائنو ڪيو ۽ رينجرز جا وڏا اٽالا پڻ واقعي واري هنڌ مقرر ڪيا ويا، جڏهن ته حيدرآباد جي ڊي سي محمد نواز سوهو پهچي هندو برداري جي ماڻهن سان ڳالهيون ڪري سندن احتجاج ختم ڪرايو. پوليس واقعي جو ڪيس 36-2014، ايف آءِ آر نمبر 298، 436 پي پي سي تحت ڪرشن ڪمار جي فرياد تي ٽن نامعلوم ماڻهن مٿان داخل ڪري ورتو آهي، جڏهن ته ڊي آءِ جي حيدرآباد ثناءُ الله عباسي واقعي جو نوٽيس وٺندي ايس ايڇ او سائيٽ عبدالله ڀٽو کي معطل ڪري ڇڏيو آهي. اقليتي معاملن واري صوبائي وزير گيانچند ايسراڻي ۽ پ پ مينارٽي ونگ سنڌ جي صدر  لعل چند اڪراڻي واقعي جو نوٽيس وٺندي رپورٽ طلب ڪري ورتي آهي، هوڏانهن پ پ اڳواڻ علي محمد سهتو، نيشنل پارٽي جي اڳواڻ تاج مري ۽ ايس اين پي چيئرمين اشرف نوناري سميت ايس ٽي پي ۽ ٻين قومپرست پارٽين جي ڪارڪنن پڻ واقعي واري هنڌ پهچي واقعي جي مذمت ڪندي هندو برداري جي ماڻهن سان يڪجهتي جو اظهار ڪيو.

ڪالوني جي ڪالي ماتا مندر جي ميلي کان 15 ڏينهن اڳ حملو

حيدرآباد: ڪالي ماتا مندر تي ساليانو هڪ ميلو لڳندو آهي، جنهن ۾ هند ۽ سنڌ مان وڏي پئماني تي هندو برادري جا ماڻهو ايندا آهن. هن سال اهو ميلو 13 اپريل تي رٿيل آهي. ميلي کان 15 ڏينهن اڳ شرپسندن پاران هنومان مندر تي حملو ڪرڻ ۽ هنومان جي مورتي جي بيحرمتي ڪري ٽوڙڻ ۽ مندر کي باهه ڏئي ساڙڻ واري واقعي بعد هندو برادري ۾ خوف ۽ حراس سميت سخت تاءُ پڻ پکڙيل آهي.

ڪالي ماتا ڪالوني ۾ 5 تاريخي مندر، 600 گهر

حيدرآباد: حيدرآباد جي فتح چوڪ وٽ 600 گهرن کان وڌيڪ ميگهواڙ برداري جي ماڻهن جي آبادي ۾ 5 تاريخي مندر قائم ٿيل آهن، جن ۾ ڪالي ماتا، شو شنڪر، بجرنگ بلي، ڀيروناٿ ۽ هنومان جو مندر شامل آهن، جن مان سڀ کان وڏو ڪالي ماتا جومندر آهي، واضح رهي ته هنومان جي مندر کانسواءِ باقي سمورا مندر وچ آبادي ۾ آهن، انهن مندرن تائين شرپسندن جي رسائي ممڪن نه هئي، تنهن ڪري آبادي جي ٻاهرئين پاسي واري رستي تي موجود هنومان جي مندر کي ٽارگيٽ بڻايو ويو.

مندر کوليندڙ نينگر کي حملو ڪندڙن پستول تاڻي خاموش ڪرايو

حيدرآباد: مندر صبح 5 وڳي کان کلندو آهي، مندر کي کوليندڙ ۽ بند ڪندڙ 14 ورهين جو نينگر درشن آهي، جيڪو پنهنجي پيءُ سان گڏ مندر جي ڀرسان هڪ پرچون جو دڪان پڻ هلائيندو آهي، جنهن شرپسندن کي اهڙي ڪارروائي ڪندي ڏٺو، جنهن کانپوءِ شرپسندن سندس لوندڙي تي پسٽل رکي کيس خاموش ڪرايو.

ڀٽائي به ڪالي ماتا مندر تي حاضري ڀري چڪو

حيدرآباد: ڪالي ماتا جو مندر فتح چوڪ ويجهو ڪالي ماتا جي نالي سان قائم ٿيل ڪالوني ۾ واقع آهي، هي قديمي مندر سوين سالن جي تاريخ رکي ٿو. ڪالي ماتا ڪالوني جي جهونن رهواسين چواڻي ته سنڌ جو عظيم صوفي شاعر حضرت شاهه عبداللطيف ڀٽائي رحه به سفر دوران ڪالي ماتا جي مندر تي حاضري ڀري هئي.

حملي خلاف حيدرآباد ۽ چمبڙ ۾ مظاهرا

حيدرآباد/چمبڙ (رپورٽر+ن ع آ) حيدرآباد ۾ مندر تي حملي، ڀڃ ڊاھه ۽ مندر کي باهه ڏئي ساڙڻ واري واقعي خلاف سنڌ مختلف علائقن سان تعلق رکندڙ هندو برداري جي ماڻهن پاران ڪالھه حيدرآباد پريس ڪلب سامهون احتجاجي مظاهرو ڪري ڌرڻو هنيو ويو، ڌرڻي دوران مظاهرين مندر تي حملي، ڀڄ ڊاھه، مندر کي باهه ڏئي ساڙڻ واري واقعي سميت مذهبي انتها پسندي خلاف سخت نعري بازي ڪئي، مظاهرين جي هٿن ۾ پلي ڪارڊ هئا جن تي مندر تي حملي ۽ مذهبي انتها پسندي خلاف نعرا لکيل هئا. ان موقعي تي ڪرمچند، پريتم داس ۽ ٻين چيو ته گذريل گهڻي عرصي کان سنڌ سميت ملڪ ۾ رهندڙ هندو ۽ ٻين مذهبن جي ماڻهن، عبادت گاهن ۽ روزگار جي وسيلن کي نشانو بڻايو پيو وڃي، جڏهن ته حڪومت پاران واقعن جي مذمت ڪرڻ کان وڌيڪ ڪي به قدم نٿا کنيا وڃن.. هوڏانهن چمبڙ شهر ۾ جسقم ۽ هندو پنچائت پاران احتجاجي مظاهرو ڪيو ويو. سوين هندو برادري جي ماڻهن ۽ جسقم ڪارڪنن احمد مڱڻهار، هادي بخش مڱڻهار، هيرالال، گيانچند سنڌي، چتن ڪمار، گلاب ڀيل ۽ ٻين شهر جو گشت ڪري پريس ڪلب آڏو احتجاج ڪيو.

حملي جي پاڻ جاچ پيو ڪريان: ڪمشنر

ڪوتاهي برداشت نه ڪبي: ڊي آءِ جي

حيدرآباد: ان سلسلي ۾ رابطو ڪرڻ تي ڪمشنر حيدرآباد سيد جمال مصطفيٰ چيو ته واقعو انتهائي افسوسناڪ ٿيو آهي، ڊي سي حيدرآباد محمد نواز سوهي کي معاملي جي هر رخ کان جاچ ڪرڻ جي هدايت ڪري ڇڏي آهي. هن چيو ته حملي جي پاڻ جاچ ڪري رهيو آهيان، واقعي واري هنڌ وڃي متاثر ٿيل مندر جو معائنو ڪيو آهي ۽ هندو برادري کي يقين ڏياريو آهي ته واقعي ۾ ملوث جوابدارن جو جلد پتو لڳائي انهن کي هر صورت ۾ قانون جي ڪٽهڙي ۾ آندو ويندو. ڊي آءِ جي حيدرآباد ثناءُالله عباسي چيو ته مندر جي تحفظ لاءِ پوليس چوڪي پڻ قائم ڪئي وئي آهي. هن چيو ته حيدرآباد  ۾ سمورن مندرن جي سيڪيورٽي جا انتظام انتهائي سخت ڪيا ويا آهن.امن امان جي قيام کي يقيني بڻائڻ، عوام جي جان، مال ۽ مذهبي عبادتگاهن کي تحفظ فراهم ڪرڻ پوليس جي ذميواري آهي، ڪوتاهي ڪندڙ پوليس عملدارن کي به ڪنهن به صورت ۾ بخش نه ڪيو ويندو.

بلاول ۽ وڏي وزير نوٽيس ورتو، رپورٽ طلب، مندرن ۽ گرجا گهرن تي نفري وڌائڻ جو فيصلو

ڪراچي: پيپلز پارٽي سربراهه بلاول ڀٽو زرداري ۽ سنڌ جي وڏي وزير سيد قائم علي شاهه حيدرآباد ۾ مندر جي بيحرمتي جو سخت نوٽيس وٺندي حيدرآباد جي ڪمشنر، ڊي آءِ جي، ايس ايس پي، ڊپٽي ڪمشنر کي هدايت ڪئي آهي ته اهي پنهنجي علائقن ۾ اقليتن جي مذهبي جاين کي هر ممڪن سيڪيورٽي فراهم ڪن ۽ ملوث عنصرن خلاف سخت ڪارروائي ڪئي وڃي. وڏي وزير تعلقي انتظاميا کان 24 ڪلاڪن اندر مڪمل ۽ تفصيلي رپورٽ به طلب ڪئي آهي. وڏي وزير سڀني ضلعن جي ضلعي انتظاميا کي هدايت ڪئي  آهي ته اهي چوڪس رهن ۽ پنهنجي انٽيليجنس نيٽ ورڪ کي وڌيڪ فعال ڪن ۽ هن سنگين ڏوهه ۾ ملوث عنصرن جي نشاندهي ڪن، جيڪي صوبي ۾ مذهبي نفرت پکيڙڻ چاهين ٿا. هن چيو ته سنڌ امن آشتي جي ڌرتي آهي. نفرتون پکيڙيندڙ انسانيت جا دشمن آهن. جڏهن ته پاڪستان پيپلزپارٽي جي سرپرست اعليٰ بلاول ڀٽو زرداري حيدرآباد مندر واقعي جو نوٽيس وٺندي سنڌ حڪومت کي فوري طور تي جاچ جو حڪم ڏنو آهي. جمعي ڏينهن پنهنجي جاري ڪيل هڪ بيان ۾ بلاول ڀٽو زرداري چيو ته پيپلزپارٽي اقليتن ۽ انهن جي عبادتگاهن جو تحفظ هر ممڪن يقيني بڻائيندي ۽ انهن سان ڪا به زيادتي برداشت نه ڪئي  ويندي. هن سنڌ جي وڏي وزير ۽ سنڌ حڪومت کي حڪم ڏنو ته فوري طور تي حيدرآباد مندر واري واقعي جي جاچ ڪرائي وڃي ۽ ان ۾ ملوث ڏوهارين خلاف سخت ڪارروائي ڪئي وڃي. ٻئي طرف حيدرآباد ۾ مندر تي ٿيل شرپسندن جي حملي کانپوءِ ڊپٽي ڪمشنر حيدرآباد محمد نواز سوهو جي صدارت هيٺ ڊي سي آفيس ۾ هنگامي اجلاس ٿيو، اجلاس ۾ ڊسٽرڪٽ هندو پنچائت جي چيئرمين ايم پرڪاش ميتاڻي، ڊي ايس پي سائيٽ سڪندر علي ڪورائي، اي ڊي سي ون غلام مرتضيٰ ميمڻ، اي سي لطيف آباد عطاا لله نهڙيو  ۽ ٻين شرڪت ڪئي. ان موقعي تي اجلاس کي خطاب ڪندي ڊي سي محمد نواز سوهو چيو ته انتظاميا، پوليس ۽ عوام جو اقليتن جي تحفظ لاءِ هر ممڪن سهڪار جاري رهندو، هندو برادري جي جان ۽ مال جي حفاظت لاءِ هر فرد کي اڳيان اچي پنهنجي ڪردار ادا ڪرڻ جي ضرورت آهي. هن چيو ته امن امان ۽ ڀائيچاري واري فضا کي خراب ڪرڻ جي ڪنهن کي به اجازت نه ڏني ويندي، ڪجهه دهشتگرد امن امان کي تباهه ڪرڻ لاءِ هر قسم جي ڪوشش ڪري رهيا آهن پر انهن جي اهڙن منصوبن کي ناڪام بڻائي ڇڏينداسين. هن چيو ته حيدرآباد ۾ مندرن، گرجا گهرن ۽ اقليتن جي عبادتگاهن ٻاهران اڃا به وڌيڪ سيڪيورٽي جا انتظام انتهائي سخت ڪندي وردي ۽ سادن ڪپڙن ۾ ملبوس پوليس اهلڪار ۽ قانون لاڳو ڪندڙ اهلڪارن کي مقرر ڪيو ويندو.

انتهاپسندي جي لهر سنڌ جي قومي جدوجهد کي نقصان پئي پهچائي: سنڌ پروگريسو ڪميٽي

ڪراچي (پ ر) : سنڌ پروگريسو ڪميٽي ءَ جي هڪ اهم گڏجاڻي جيئي سنڌ محاذ جي مرڪزي آفس سنڌ سينٽر تي سچل ڳوٺ ڪراچيءَ ۾ ٿي گذري ـ گڏجاڻي ۾ جيئي سنڌ محاذ طرفان عبدالخالق جوڻيجو ، علي محمد مستوئي ۽ اياز هڪڙو، عوامي ورڪرس پارٽي پاران يوسف مستي خان ، بخشل ٿلهو ۽ شاهه نور جڏهن ته ڪميونسٽ پارٽي طرفان امداد قاضي ۽ ڪامريڊ رشيد شريڪ ٿيا.گڏجاڻي سنڌ پروگريسو ڪميٽيءَ طرفان گذريل ڇهن مهينن کا مذهبي بنياد پرستيءَ خلاف هلايل مهم ۽ “ مذهبي رواداري ۽ سنڌ “  جي عنوان تحت ٿيندڙ ڪانفرنسن جو جائزو وٺندي چيو ويو ته مذهبي انتها پسندي جي وڌندڙ لهر نه رڳو سنڌ جي قومي ۽ طبقاتي جدوجهد کي نقصان پهچائي رهي آهي پر اها سنڌ جي سيڪيولر سماج ۽ تاريخي شناخت لاءِ پڻ خطرو بڻجندي پئي وڃي ان ڪري فيصلو ڪيو ويو ته ان مهم کي وڌيڪ اثرائتي نموني اڳتي وڌائجي ۽ سول سوسائٽي سان گڏ ٻين سيڪيولر سياسي پارٽين کي پڻ وڌيڪ ملوث ڪرڻ لاءِ ڪوششون وٺجن.

سنڌ حڪومت مندرن تي حملن ۾ ملوث جوابدار ن خلاف ڪابه ڪارروائي نه ٿي ڪري: کيئلداس

ڪراچي: پاڪستان مسلم ليگ سنڌ جي اڳواڻ کيئلداس ڪوهستانيءَ حيدرآباد ۾ مندر تي حملي ۽ ڀڃ ڊاهه جي سخت لفظن ۾ مذمت ڪندي چيو آهي ته ڪجهه عرصي کان هڪ سازش هيٺ لڳاتار مندرن تي حملا ٿي رهيا آهن، جڏهن ته سنڌ حڪومت حملن ۾ ملوث جوابدار ن خلاف ڪابه ڪارروائي نه ٿي ڪري. هن چيو ته هن ان معاملي کان وفاقي سرڪار کي به آگاهي ڏني آهي، هن چيو ته سنڌين کي اقليت ۾ آڻڻ لاءِ سازشي ٽولو اهڙو شازشون ڪري رهيو آهي، پر سنڌ جا هندو پنهنجي اتحاد وسيلي ماتر ڀوميءَ خلاف سازشن کي ناڪام بڻائيندا.

عوامي آواز جي ويب سائيٽ تان ورتل خبرون

---------------------------------------------------------------

حيدرآباد ۾ مندر تي حملو، ڀڃ ڊاهه، پيٽرول هاري باهه، بلاول نوٽيس ورتو، ڊيس ايس پي ۽ ايس ايڇ او معطل

حيدرآباد(ڪاوش نيوز) حيدرآباد ۾ مندر تي حملو، ڀڃ ڊاهه، پيٽرول هاري باهه، بلاول ڀٽو زرداري نوٽيس ورتو، ڊي ايس پي ۽ ايس ايڇ او معطل، ڊي سي ۽ ٻيا عملدار پهتا، اقليتن کي تحفظ فراهم ڪرڻ جي خاطري، انهي سلسلي ۾حيدرآباد جي سائيٽ ايريا واري علائقي فتح چوڪ ڀرسان هڪ ڪار ۾ سوار هٿياربند ڪالي ماتا ڪالوني ۾ پوڄا بهاني هنو مان مندر ۾ داخل ٿي ڀڃ ڊاهه ڪرڻ بعد مندر اندر پيٽرول هاري باهه ڏئي فرار ٿي ويا، ڀڃ ڊاهه سبب مندر ۾ رکيل مورتين ۽ مندر کي نقصان پهتو، واقعي بعد جوابدار ڪار ۾ فرار ٿي ويا، اطلاع تي علائقي واسي هندو برادري جي هڪ وڏي انگ واقعي خلاف احتجاج ڪندي ٽنڊو محمد خان روڊ تي ڌرڻو هڻي ٽائر ساڙيا، اطلاع تي ڊپٽي ڪمشنر حيدرآباد، اي ڊي او جي حيدرآباد ۽ ٻيا اعليٰ انتظاميا جا عملدار موقعي تي پهچي ويا، احتجاج ڪندڙن سان ڳالهيون ڪري کين تحفظ ۽ جوابدارن جي گرفتاري جو يقين ڏياري احتجاج ختم ڪرايو، آءِ جي سنڌ ۽ ڊي آءِ جي حيدرآباد ڊيوٽي ۾ غفلت ۽ اقليتن کي تحفظ فراهم نه ڪرڻ جي الزام هيٺ ڊي ايس پي سائيٽ سڪندر ڪورائي کي معطل، ايس ايڇ او سائيٽ عبدالله ڀٽو کي ريورٽ ۽ معطل ڪري ضلعي بدر ڪندي سندس بدلي سجاول ڪري ڇڏي آهي، ٻئي پاسي سائيٽ پوليس مندر ڪاميٽي جي عهديدار ڪرشن ڪمار ميگهواڙ جي رپورٽ تي واقعي بابت قلم 6/7 اي ٽي اي، 295 اي، 436 ۽ 34 پي پي سي هيٺ نامعلوم جوابدارن خلاف ايف آءِ آر نمبر 36/14 داخل ڪري ورتي آهي، هوڏانهن پيپلز پارٽي جي سرپرست اعليٰ بلاول ڀٽو زرداري حيدرآباد مندر واري واقعي جو نوٽيس وٺندي سنڌ حڪومت کي فوري طور تي جاچ جو حڪم ڏنو آهي، بلاول چيو آهي ته پيپلز پارٽي اقليتن ۽ انهن جي عبادتگاهن جو تحفظ هر ممڪن يقيني بڻائيندي ۽ انهن سان ڪا به زيادتي برداشت نه ڪئي ويندي، هن وزير اعليٰ سنڌ ۽ سنڌ حڪومت کي حڪم ڪيو ته فوري طور تي حيدرآباد مندر واري واقعي جي جاچ ڪرائي وڃي ۽ ان ۾ ملوث ڏوهارين خلاف سخت ڪارروائي ڪئي وڃي، ٻئي طرف وڏي وزير سيد قائم علي شاهه ڪمشنر، ڊي آءِ جي، ايس ايس پي ۽ ڊي سي حيدرآباد کي ضلعي ۾ اقليتن جي مذهبي جاين جي مڪمل سيڪيورٽي فراهم ڪرڻ ۽ واقعي ۾ ملوث عنصرن خلاف سخت ڪارروائي ڪرڻ جو حڪم ڏنو آهي، جڏهن ته تعلقي انتظاميا کان 24 ڪلاڪن اندر واقعي بابت تفصيلي رپورٽ طلب ڪئي آهي، سرڪاري پڌرائي ۾ وڏي وزير چيو آهي ته جيڪي صوبي ۾ مذهبي ڏڦيڙ پکيڙڻ چاهين ٿا انهن عنصرن جي نشاندهي ڪئي وڃي، سنڌ امن واري ڌرتي آهي جيڪي عنصر نفرتون پکيڙڻ چاهين ٿا اُهي انسانيت جا دشمن آهن، ٻئي طرف اقليتي معاملن واري صوبائي وزير گيانچند ايسراڻي حيدرآباد ۾ مندر تي حملي واري واقعي جو نوٽيس وٺندي فوري طور جاچ رپورٽ طلب ڪري ورتي آهي، صوبائي وزير ڊي آءِ جي حيدرآباد سان فون تي رابطو ڪري مندر تي حملي ۾ ملوث جوابدارن کي فوري طور گرفتار ڪرڻ جي هدايت ڪئي، ٻئي طرف ڊي سي حيدرآباد مندر تي حملي واري واقعي کانپوءِ هندو برادري جي هڪ وفد سان ملاقات ڪئي، جنهن ۾ محمد نواز سوهو کين مڪمل تحفظ فراهم ڪرڻ جي خاطري ڪرائي، هن چيو ته ڪنهن کي به امن خراب ڪرڻ جي اجازت نه ڏني ويندي، اقليتن جي تحفظ لاءِ ڀرپور ڪوششون ڪيون وينديون، جنهن علائقي ۾ هي واقعو ٿيو آهي اتان جا رهواسي پورهيت طبقي سان تعلق رکن ٿا ۽ پر امن شهري آهن، گڏجاڻي ۾ ڊسٽرڪٽ هندو پنچائت جو چيئرمين ايم پرڪاش ميتاڻي ۽ ٻيا پڻ شريڪ ٿيا، جڏهن ته مسلم ليگ (ن) سنڌ جي اڳواڻ کيئل داس ڪوهستاني حيدرآباد ۾ مندر تي ڪيل حملي جي سخت لفظن ۾ مذمت ڪندي چيو ته سنڌ حڪومت مڪمل طور ناڪام وئي آهي، جاري ڪيل بيان ۾ هن چيو ته سنڌ ۾ ٿوري عرصي اندر هندن جي عبادتگاهن تي هي ٽيون حملو آهي، پر حڪومت ڪا به ڪارروائي نه ڪئي آهي، نه ئي سنڌ ۾ هندن جي عبادتگاهن تي سيڪيورٽي جا ڪي قدم کنيا ويا آهن، هوڏانهن واقعي خلاف چمبڙ ۾ هندو اتحاد ۽ جسقم پاران هير لال، گلاب ڀيل، احمد مڱڻهار ۽ ٻين جي اڳواڻي ۾ ريلي ڪڍي وئي.

---------------------------------------------------------------

حيدرآباد جي تاريخي مندر تي حملو، هنومان جي مورتي ٽوڙي وئي، ڪمري کي باهه، احتجاج

حيدرآباد (عبرت اخبار) شر پسند انتهاپسندن حيدرآباد جي  تاريخي مندر ۾ ٽوڙ ڦوڙ ڪرڻ بعد مندر کي باهه ڏئي فرار ٿي ويا، هندو برداري جي سوين ماڻهن ۽ ايس اين پي پاران انتهاپسندن پاران ڪيل اهڙي ڪريل حرڪت خلاف حيدرآباد-ٽنڊو محمد خان روڊ فتح چوڪ  تي احتجاجي مظاهرو ڪري ڌرڻو هڻي ٽائرن کي باهيون ڏئي روڊ بلاڪ ڪيو ويو، ڊي آءِ جي حيدرآباد ثناءُ الله عباسي واقعي جو نوٽيس وٺندي ايس ايڇ او کي معطل ڪري ڇڏيو، واقعي جو ڪيس سائيٽ ٿاڻي تي ٽن نامعلوم ماڻهن مٿان ڪيس داخل.24 ڪلاڪن اندر جوابدار گرفتار نه ٿيڻ جي صورت ۾ ايس اين پي پاران هندو برادريءَ سان گڏجي فتح چوڪ تي ڌرڻو هڻي حيدرآباد –ٽنڊو محمد خان ۽ ميرپور خاص روڊ بند ڪرڻ جو چتاءُ. حيدرآباد جي سائيٽ ٿاڻي جي حد فتح چوڪ وٽ 6 سئوکان وڌيڪ گهرن تي مشتمل ميگهواڙ برادري جي ڪالي ماتا ڪالوني ۾ قائم تاريخي هنومان جي مندر وٽ ڪالهه صبح جو 7 وڳي هڪ بنا نمبر پليٽ جي  سلور رنگ جي ڪرولا ڪار ۾ سوار 4 نامعلوم انتهاپسند اردو ڳالهائيندڙ عبادت جي بهاني سان مندر ۾ داخل ٿي پهرين اگر بتيون کڻي عبادت جو ڍونگ ڪيو، جنهن بعد مندر ۾موجود هنومان جي  مورتي جي بيحرمتي ڪرڻ بعد ان کي ڊاهڻ سميت مندر ۾ ٽوڙ ڦوڙ ڪري هنومان جي مورتيءَ تي گاسليٽ هاري باهه ڏئي ڇڏي جنهن ڪري مندر جو اندريون حصو پڻ سڙي ويو. شرپسند اهڙي ڪار روائيءَ بعد فرار ٿي ويا، اهڙي خبر پوڻ جنهن کانپوءِ هندو برادري جا سوين ماڻهو پنهنجي مقدس عبادتگاهه وٽ جمع ٿي ويا، جن حيدرآباد-ٽنڊو محمد خان روڊ تي احتجاجي مظاهرو ڪندي ڌرڻو هڻي ٽائرن کي باهيون ڏئي روڊ بلاڪ ڪري ڇڏيو، ايس اين پي جا ڪارڪن پڻ وڏي تعداد ۾ اشرف نوناري جي اڳواڻيءَ ۾ هندو براديءَ جي مظاهري ۾ يڪجهتي طور شامل ٿيا، مظاهري ۾ هندو برادري جي سوين مردن، عورتن ۽ ٻارڙن پنهنجي عبادتگاهه جي بيحرمتي ڪرڻ خلاف سخت نعريبازي ڪئي. ان حوالي سان هندو برداري جي ماڻهن ميڊيا سان ڳالهائيندي ٻڌايو ته ڄاڻايل مندر صبح 5 وڳي کان کلندو آهي، جنهن ۾هندو برداري جا ماڻهو صبح جو عبادت ڪرڻ کانپوءِ پنهنجن گهرن کان پورهيو ڪرڻ لاءِ نڪري ويندا آهن. هنن چيو ته صبح تقريبن 7 وڳي ڌاري هڪ بنان نمبر پليٽ جي سلور رنگ جي ڪرولا ڪار ۾ سوار 4  ماڻهو آيا جن مان 3 ماڻهو لهي  مندر ۾ داخل ٿيا ۽ مندر پهرين عبادت جو بهانو ڪري اگر بتيون باريون ۽ بعد ۾  ٽوڙ ڦوڙ ڪري هنومان جي مورتي جي بيحرمتي ڪري گاسليٽ هاري مورتي ۽ مندر کي باهه ڏئي فرار ٿي ويا. هنن چيو ته مندر کي باهه ڏيندڙ ماڻهن کي ڏسندڙ نينگر درشن کي شرپسندن لوندڙيءَ تي پستول رکي خاموش ڪرڻ بعد آساني سان فرار ٿي ويا. هنن چيو ته ساڻن وڏو ظلم ٿيو آهي، سندن مقدس جاين کي نشانو بڻايو پيو وڃي، سندن مقدس جاءِ کي ساڙڻ وارا انسان ناهن، سندن ڌرم سان چيڙ ڇاڙ ڪري ڪريل حرڪت ڪئي وئي آهي، اهڙن ماڻهن کي گرفتار ڪري سخت سزا ڏني وڃي. ٻئي طرف اطلاع ملڻ تي پوليس پهچي واقعي واري هنڌ جو معائنو ڪيو ۽ رينجرس جا وڏا اٽالا پڻ واقعي واري هنڌ مقرر ڪيا ويا، جڏهن ته حيدرآباد جي ڊي سي محمد نواز سوهو پهچي هندو برداري جي ماڻهن سان ڳالهيون ڪري سندن احتجاج ختم ڪرايو. پوليس واقعي جو ڪيس 36-2014، ايف آءِ آر نمبر 298، 436 پي پي سي تحت رهواسي ڪرشن ڪمار جي فرياد تي ٽن نامعلوم ماڻهن مٿان داخل ڪري ورتو آهي، جڏهن ته ڊي آءِ جي حيدرآباد ثناءُ الله عباسي واقعي جو نوٽيس وٺندي ايس ايڇ او سائيٽ عبدالله ڀٽو کي معطل ڪري ڇڏيو آهي. هوڏانهن پ پ اڳواڻ علي محمد سهتو، نيشنل پارٽي جي اڳواڻ تاج مري، هندو پنچائت جي ڊاڪٽر دليپ ڪمار دولتاڻي  سميت ايس ٽي پي ۽ ٻين قومپرست پارٽين جي ڪارڪنن پڻ واقعي واري هنڌ پهچي واقعي جي مذمت ڪندي هندو برداري جي ماڻهن سان يڪجهتي جو اظهار ڪيو. ان موقعي تي ايس اين پي چيئرمين اشرف نوناري چيو ته جيڪڏهن 24 ڪلاڪن اندر جوابدار گرفتار نه ڪيا ويا ۽ اتي مستقل چوڪي قائم نه ڪئي وئي ته هندو برادريءَ سان گڏجي فتح چوڪ تي وڏو ڌرڻو هڻي حيدرآباد-ٽنڊو محمد خان ۽ ميرپور خاص روڊ بلاڪ ڪيو  ويندو.

بلاول ڀٽو پاران مندر تي حملي جي فوري جاچ جو حڪم

حيدرآباد: مندر جي پوڄاري ساجن ڀڳت چيو ته ڪجهه شرپسند انتها پسندن مندر تي ڪيل حملو انتهائي شرمناڪ عمل آهي، هن چيو ته اسان ڪڏهن به ڪنهن کي ڪا تڪليف نه ڏني آهي هتي سدائين مسلمان ۽ هندو پاڻ ۾ ڀائرن جيان رهن ٿا، هن چيو لاڙڪاڻي وارو واقعو اڃا تازوئي آهي ته مٿان هي واقعو ڪري هندو برادريءَ کي خوفزده ڪيو پيو وڃي، هن چيو ته اسان ڊي سي، ڊي آءِ جي ۽ ضلعي جي ٻئي انتظاميا کي چيو آهي ته تحقيقات ڪري جوابدار ڪرفتار ڪرڻ سميت هتي مستقل پوليس چوڪي قائم ڪئي وڃي ۽ 13 اپريل تي ٿيندڙ ميلي جي مڪمل سيڪيورٽي ڏني وڃي.

---------------------------------------------------------------

حيدرآباد ۾ قديمي مندر تي حملو، ڀڃ ڊاهه ۽ باهه، هندو برادري جا ماڻهو روڊن تي نڪري آيا، ڌرڻو، روڊ بلاڪ، ڊي ايس پي ۽ ايس ايڇ او معطل

حيدرآباد(سوڀ اخبار) سنڌ سرڪار جي سخت هدايتن باوجود انتظاميا حيدرآباد ۾ هندن جي مذهبي عبادتگاهن جو تحفظ ڪرڻ ۾ ناڪام، اڻڄاتل انتهاپسندن جو قديمي تاريخي ڪالي ماتا مندر تي حملو، هنومان جي مندر کي باهه ڏئي ساڙي ڇڏيو، واقعي خلاف ايس اين پي ۽ هندو برادري جا احتجاجي مظاهرا، ڌرڻا، ٽائرن کي باهيون، پوليس ۽ رينجرس جي اٽالن علائقي کي گهيري ۾ آڻي ڇڏيو. ڊي آءِ جي حيدرآباد واقعي جو نوٽيس وٺندي حد جي ايس ايڇ او کي هٽائي ڇڏيو، واقعي کانپوءِ ڪالي ماتا مندر جي تحفظ لاءِ پوليس پڪٽ قائم. تفصيل موجب حيدرآباد جي سائيٽ ٿاڻي جي حد فتح چوڪ ويجهو ڪالهه صبح جو سوير ساڍي ڇهين وڳي ڌاري ڪار ۾ سوار ٿي آيل نامعلوم شرپسندن علائقي ۾ قائم قديمي تاريخي ڪالي ماتا مندر تي حملو ڪري ڏنو، هٿياربند شرپسندن ڪالي ماتا مندر جي اندر واقعي هنومان جي مندر ۾ ڀڃ ڊاهه ڪرڻ بعد هنومان جي مورتي کي ڪيرائي گاسليٽ هاري مندر کي باهه ڏئي ڇڏي. اهڙو واقعو ڪرڻ بعد شرپسند ڪار ۾ سوار ٿي فرار ٿي ويا. واقعي جي خبر حيدرآباد شهر ۾ باهه جيان پکڙجي وئي، پ پ اڳواڻ علي محمد سهتو، سنڌ نيشنل پارٽي جو سربراهه اشرف نوناري سميت مختلف سياسي سماجي تنظيمن جا اڳواڻ، ڪارڪن ۽ وڏي انگ ۾ هندو برادري جا ماڻهو متاثر مندر ۾ پهچي ويا، جڏهن ته واقعي جو اطلاع ملڻ تي ڊي آءِ جي حيدرآباد ثناءُالله عباسي، ڊپٽي ڪمشنر حيدرآباد محمد نواز سوهو ۽ ٻيا عملدار پهتا، جن صورتحال جو جائزو ورتو، پوليس ۽ رينجرس جا وڏا اٽالا پڻ پهتا، جن ڪنهن به اڻوڻندڙ واقعي کي منهن ڏيڻ جي لاءِ علائقي کي گهيري ۾ آڻي ڇڏيو هو، هوڏانهن ڊي آءِ جي حيدرآباد ثناءُ الله عباسي مندر تي ٿيل حملي جو فوري طور تي نوٽيس وٺندي سائيٽ ٿاڻي جي ايس ايڇ او عبدالله کي معطل ڪندي ڊي ايس پي خلاف ڪارروائي ڪرڻ جي لاءِ آءِ جي سنڌ کي سفارش ڪري ڇڏي آهي. جڏهن ته واقعي کانپوءِ ڪالي ماتا مندر جي تحفظ لاءِ مندر جي ٻاهران پوليس پڪٽ قائم ڪئي وئي آهي. مندر تي ٿيل حملي جو ڪيس سائيٽ ٿاڻي جي پوليس ڪرشن ڪمار ولد بابو جي فرياد تي گناهه نمبر 14/36، قلم نمبر298، سيڪشن 436، پي پي سي 7/6 اي ٽي اي دهشتگردي ايڪٽ تحت ٽن نامعلوم جوابدارن خلاف داخل ڪري ورتو آهي. هوڏانهن واقعي خلاف سنڌ نيشنل پارٽي جي سربراهه اشرف نوناري جي اڳواڻي ۾ هندو برادري جي سوين ماڻهن پاران حيدرآباد-ٽنڊو محمد خان روڊ تي واقعي خلاف 4 ڪلاڪن تائين احتجاجي مظاهرو ڪري ڌرڻو هنيو ويو، مظاهرين ٽائرن کي باهيون ڏئي روڊ بلاڪ ڪري ڇڏيو ۽ واقعي خلاف سخت نعريبازي ڪئي، روڊ بلاڪ ٿيڻ سبب ٽرئفڪ جو نظام معطل ٿي ويو. جنهن بعد حيدرآباد پريس ڪلب سامهون پڻ احتجاجي مظاهرو ڪيو ويو. مظاهري ۾ شامل سياسي سماجي تنظيمن جي اڳواڻن ۽ هندو برادري جي ماڻهن سنڌ سرڪار کان مطالبو ڪيو آهي ته مندر تي ٿيل حملي جو فوري طور تي نوٽيس وٺي ملوث شرپسندن کي گرفتار ڪري کين عوام آڏو وائکو ڪيو وڃي. ڊپٽي ڪمشنر محمد نواز سوهو، ڊي آءِ جي حيدرآباد ثناءُالله عباسي، پ پ اڳواڻ علي محمد سهتي ۽ ٻين احتجاج ڪندڙ هندو برادري سان ڳالهيون ڪري واقعي ۾ ملوث شرپسندن کي جلد پتو لڳائي گرفتار ڪري وائکو ڪرڻ جي خاطري ڪرائي احتجاج ختم ڪرايو. جڏهن ته اهڙي واقعي کانپوءِ مندر جي ٻاهران وڏي انگ ۾ پوليس ۽ رينجرس جي اهلڪارن کي مقرر ڪيو ويو آهي. ان سلسلي ۾ رابطو ڪرڻ تي ڪمشنر حيدرآباد سيد جمال مصطفيٰ روزاني ”سوڀ“ سان ڳالهائيندي چيو ته واقعو انتهائي افسوسناڪ ٿيو آهي، ڊي سي حيدرآباد محمد نواز سوهو کي معاملي جي هر رخ کان جاچ ڪرڻ جي هدايت ڪري ڇڏي آهي. هن چيو ته واقعي ۾ ملوث شرپسندن کي ڪنهن به صورت ۾ بخش نه ڪيو ويندو، ڊپٽي ڪمشنر محمد نواز سوهو ”سوڀ“ سان ڳالهائيندي چيو ته مندر تي ٿيل حملي جي پاڻ جاچ ڪري رهيو آهيان، واقعي واري هنڌ وڃي متاثر ٿيل مندر جو معائنو ڪيو آهي ۽ هندو برادري کي يقين ڏياريو آهي ته واقعي ۾ ملوث جوابدارن جو جلد پتو لڳائي انهن کي هر صورت ۾ قانون جي ڪٽهڙي ۾ آندو ويندو. ڊي آءِ جي حيدرآباد ثناءُالله عباسي چيو ته واقعي کانپوءِ فرضن ۾ ڪوتاهي ڪرڻ تي حد جي ايس ايڇ او کي عهدي تان هٽائي ڇڏيو آهي، امن امان جي قيام کي يقيني بڻائڻ، عوام جي جان، مال ۽ مذهبي عبادتگاهن کي تحفظ فراهم ڪرڻ پوليس جي ذميواري آهي، ڪوتاهي ڪندڙ پوليس عملدارن کي به ڪنهن به صورت ۾ بخش نه ڪيو ويندو. هوڏانهن ڊپٽي ڪمشنر جي صدارت هيٺ هنگامي اجلاس ٿيو، جنهن ۾ اقليتي برادري جي وفد پڻ شرڪت ڪئي، اجلاس ۾ فيصلو ڪيو ويو ته مندرن، گرجا گھرن ۽ اقليتن جي عبادتگاهن جي ٻاهران سيڪيورٽي سخت ڪئي ويندي، جھنگلي جيوت، ٻيلي کاتي ۽ اقليتي معاملن واري صوبائي وزير گيانچند ايسراڻي حيدرآباد ۾ مندر تي حملي واري واقعي جو نوٽيس وٺندي فوري طور جاچ رپورٽ طلب ڪري ورتي آهي، صوبائي وزير گيانچند ايسراڻي ڊي آءِ جي حيدرآباد ثناءُ الله عباسي سان فون تي رابطو ڪري مندر تي حملي ۾ ملوث جوابدارن کي فوري طور گرفتار ڪرڻ جي هدايت ڪئي، ڊي آءِ جي حيدرآباد صوبائي وزير کي ٻڌايو ته غفلت ڪرڻ تي ڊي ايس پي ۽ ايس ايڇ او کي معطل ڪيو ويو آهي، صوبائي وزير گيانچند ايسراڻي چيو ته اقليتي برادري جي عبادتگاهن تي حملا ڪندڙ عنصرن کي وائکو ڪيو ويندو، هن چيو ته حملن ۾ ملوث جوابدارن کي گرفتار ڪري سخت سزا ڏني ويندي، صوبائي وزير چيو ته سنڌ حڪومت اقليتي برادري کي مڪمل تحفظ فراهم ڪندي، هوڏانهن مينارٽي ونگ سنڌ جي صدر ۽ ايم پي اي لعل چند اڪراڻي ۽ ايم پي اي پيسو مل پڻ واقعي جي سخت لفظن ۾ مذمت ڪئي آهي. پاڪستان پيپلز پارٽي جي سرپرستِ اعليٰ بلاول ڀُٽي زرداري حيدرآباد مندر واري واقعي جو نوٽيس وٺندي سنڌ حڪومت کي فوري طور تي جاچ جو حڪم ڏنو آهي. جمعي ڏينهن پنهنجي جاري ڪيل بيان ۾ بلاول ڀُٽي زرداري چيو ته پيپلز پارٽي اقليتن ۽ انهن جي عبادتگاهن جو تحفظ هر صورت ممڪن بڻائيندي ۽ انهن سان ڪا به زيادتي برداشت نه ڪئي ويندي. هن وزيراعليٰ سنڌ ۽ سنڌ حڪومت کي حڪم ڪيو ته فوري طور تي حيدرآباد مندر واري واقعي جي جاچ ڪرائي وڃي ۽ ان ۾ ملوث ڏوهارين خلاف سخت ڪارروائي ڪئي وڃي. هوڏانهن سنڌ جي وڏي وزير سيد قائم علي شاهه حيدرآباد ۾ مندر جي بي حرمتي واري واقعي جو سختي سان نوٽيس وٺندي ڪمشنر، ڊي آءِ جي پوليس، ايس ايس پي، ڊپٽي ڪمشنر حيدرآباد کي هدايت ڪئي آهي ته پنهنجي پنهنجي علائقن ۾ مذهبي جاين کي سيڪيورٽي فراهم ڪن ۽ ملوث ڌرين خلاف سخت ڪارروائي عمل ۾ آندي وڃي. وزير اعليٰ سنڌ تعلقي انتظاميا کان 24 ڪلاڪن اندر مڪمل ۽ تفصيلي رپورٽ طلب ڪئي آهي، وڏي وزير سڀني ضلعن جي انتظاميا کي هدايت ڪئي آهي ته هو چوڪس رهن ۽ پنهنجي انٽيليجنس نيٽ ورڪ کي وڌيڪ فعال ڪن ، ان سنگين ڏوهه ۾ ملوث ڌرين جي نشادهي ڪئي وڃي جيڪي مذهبي نفرت پکيڙڻ چاهن ٿا هن چيو ته سنڌ امن ۽ آشتي جي ڌرتي آهي نفرتون پکيڙيندڙ انسانيت جا دشمن آهن. هوڏانهن صوبائي وزير گيانچند ايسراڻي جو ڊي آءِ جي سان فون تي رابطو، پ پ مينارٽي ونگ سنڌ جي صدر ايم پي لالچند اڪراڻي، پيسو مل، سريندر ولاسائي ۽ کئيلداس ڪوهستاني پاران جوابدار گرفتار ڪرڻ جو مطالبو.

---------------------------------------------------------------